FATTOHHON.COM

“КЎЗЁШИМ” ФИЛЬМИ ПРЕМЬЕРАСИДАН! АЁЛ САБРИ, ЁКИ САДОҚАТ СЎЗИ ЭРКАК ВА АЁЛ УЧУН БАРОБАРМИ? 06.06.2015 19:57

5 июнь куни «Киночилар уйи» ва «Алишер Навоий» киносаройларида «Кўзёшим» фильмининг премьераси бўлиб ўтди!

Соат 17.00 да бўлиб ўтган “Киночилар уйи”даги премьерада,

фильм ижодкорларини фильм режиссёри Озод Шамс таништириб ўтди.

Фильмда асосий роллардан бирини ижро қилган Ўзбекистонда хизмат кўрсатган артист Саида Раметова фильм ҳақида фикрларини баён қилиб, барчага миннатдорчилик билдириб, фильм ижодкорларига омад тилади.

Сўнг, фильм ижодкорлари “Алишер Навоий” киносаройида бўлиб ўтажак премьерага шошилдилар.

"Алишер Навоий" киносаройидаги премьерани бошловчи DJ Рустамбек олиб борди.

Фильм ижодкорлари саҳнага таклиф этилдилар.

Фильм продюсери Руслан Мирзаев

Режиссёр Озод Шамс

Сценарий муаллифлари Феруза Фаттохова,

Саида Вахобова

Бош ролларда Асал Шодиева,

Шавкат Комилов,

ҳамда Саида Раметова

Шунингдек, фильмда Ҳамид Тошпўлатов, Муяссар Бердиқулова, Азиза Бегматова, Акмал Назаров, Мунаввара Абдуллаева, Жасур Кенжаев ва бошқалар турли характердаги ролларни ижро этганлар.

Оператор Умид Маликов

Ижодкорлар таништирувидан сўнг, сўз фильм режиссёри Озод Шамсга берилди ва у фильмнинг ижодий жамоасига миннатдорчилик билдирди.

Фильм намойиши бошланди. Фильм реал ҳаётий воқеаларга асосланган.

Фильм учун ҳозирги кундаги энг долзарб мавзу, яъни оила, фарзанд, меҳр-оқибат мавзуси асос қилиб олинган. Фильмнинг асосий ютуқларидан бири, шубҳасиз бу унинг сценарийси бўлиб, унда ҳар бир ҳолатга алоҳида ёндошилган, ҳамда асослаб берилган. Деярли ҳар бир эпизод томошабинларнинг кўзини ёшлантирди!

Фильмнинг режиссёрлик иши ҳам ўзига хос бўлиб, режиссёр фильм мавзусини чуқур ҳис қилганлиги, ўз ишига юқори масъулият билан қараганлиги билиниб турибди!

Кўпгина эпизодлар томошабинлар учун ўзига хос янгилик ва ҳаттоки ибрат ҳам бўла олади! Нафақат бу эпизодларда, балки фильм мавзуси, ундаги қаҳрамонлар характерида ҳам ҳақиқий ўзбеконаликни кўриш мумкин эди. Айниқса, бош қаҳрамон аёлнинг эри учун, оиласи тинчлиги учун ишдан бўшаш ҳақида ариза ёзиши, бош қаҳрамон йигитнинг эса, “ҳеч қачон рафиқамга хиёнат қилмайман” деган сўзлари, ҳамда рафиқани била туриб, бор айбни ўзига олиши, бу билан уйдаги гапни кўчага олиб чиқмай, эри ва оиласи номига гард юқтирмасликка уринишлари акс этган эпизодлар, томошабинларнинг кучли олқишларига сабаб бўлди! Фильм якунига қадар, бирор томошабин зални тарк этмади!

Шу ўринда фильмдаги бош қаҳрамон аёлнинг характерида, бошқаларга ибрат бўлгулик, ҳақиқий ўзбек аёлига хос жиҳатлар садоқат, сабр, ҳамда ўз умр йўлдошига чексиз меҳр-оқибат мужассам! Қолаверса, фильм мазмунида ҳам, оила муқаддаслиги акс этади. Бош қаҳрамон аёлнинг биргина “оила бузиш учун қурилмайди” деган гапининг ўзиданоқ, унинг қанчалик оқила эканлиги сезилади.

Бош қаҳрамон йигитнинг характерида эса, ўзига хос мардлик ва қаъият бор. Бу икки қаҳрамонларни актриса Асал Шодиева ва актёр Шавкат Комиловлар маромига етказиб, ишонарли ижро қилишган.

Фильмдаги яна бир асосий қаҳрамон бу қайнона, лекин у шунчаки қайнона эмас, авваламбор она! Фильмда қайнона образи бўлса ҳам, бу шунчаки қайнона-келин можароси эмас! Фильмдаги бу қайнона Саида Раметованинг бошқа фильмлардаги “қайнона” ролларидан бутунлай фарқ қилади!

Фильм қаҳрамонлари ҳаёти, ҳозирги кунда ёш оилаларни мустаҳкамлиги йўлида, ёшларга, айниқса, оила қураётган ёш қизларга ибрат бўлиб, уларни ҳаётдаги турли синовларни енгиб ўтишга, оила аъзоларига нисбатан меҳр-оқибатли бўлишга, ҳамда ҳамиша оилани муқаддас деб, қадрлашга ундаши, табиий.

Минг марта гапиргандан бир марта кўрган яхши, деганларидек ҳозирда “Кўзёшим” фильми Юртимиз кинотеатрларида намойиш этилмоқда!

Элдор Раҳмонов