FATTOHHON.COM
« Все новости 
26 июнь куни Ўзбекистон Давлат Санъат ва маданият институтида “Талаба ёшлар фестивали” якуни, ҳамда Бакалаврлар ва Магистрларнинг Битирувига бағишланган тантанали маросим бўлиб ўтди.
Жорий йилнинг 1-12 июнь кунлари мазкур институт талабаларининг анъанавий “Талаба ёшлар фестивали” ўтказилган эди. (МАЪЛУМОТГА ЎТИШ!)
Тадбир доирасида институтнинг ҳар бир кафедралари ўзларининг фаолиятлари билан боғлиқ бўлган кўргазмали воситалар билан қатнашдилар. Фестиваль давомида бадиий ва ғоявий жиҳатдан мустаҳкам саҳна асарлари, концерт дастурлари намойиш қилинди.
Фестивалга тақдим қилинган ишлар Ҳакамлар ҳайъати томонидан баҳоланиб, улар ичидан энг кучлилари ва яхшилари танлаб олинди.
Фестивалнинг ёпилиши маросимида эса, энг яхши ижодкорлар институт маъмурияти томонидан белгиланган пул мукофотлари билан тақдирланишди.
Ёшларнинг ижодга бўлган интилишларини ўстириш, уларнинг ижодини рағбатлантириш мақсадида, маъмурият томонидан номинациялар ҳам эълон қилинди. Жумладан, “Йилнинг энг фаол талабаси”, “Йилнинг энг яхши аёл хонандаси”, “Йилнинг энг яхши хонандаси”, “Йилнинг энг яхши дирижёри”, “Йилнинг энг яхши созандаси”, “Йилнинг энг яхши диплом спектакли” ва бошқалар...
Номинация эгаларига мукофотларни Ўзбекистон Халқ артистлари, устозлар топширишди.
Шунингдек, таниқли санъаткорлар ва хонандалар иштирокида концерт дастури ҳам бўлиб ўтди. Унда Ўзбекистон Халқ артисти Зулайҳо Бойхонова,
Ўзбекистонда хизмат кўрсатган артистларТоир Қўзиев,
Дилноза Исмияминова,
Самандар Ҳамроқулов,
“Ниҳол” мукофоти совриндори Улуғбек Раҳматуллаев,
хонанда Гули Асалхўжаева,
"Сурхон" гуруҳи,
"Дурдона" гуруҳи,
“Тумор” рақс гуруҳи ва бошқалар иштирок этишди.
Маросимни актриса Нигора Каримбоева ва актёр, хонанда (“Элдидо” гуруҳидан) Дилниёз Ғаффоровлар, ҳамда бир неча ижодкорлар навбатма-навбат олиб боришди.
Мазкур Фестиваль маданият, санъат соҳасида амалга оширилаётган ишларнинг янги босқичга кириб бораётганлигини ўзида ифода этади. Келгусида мазкур ёш ниҳоллардан ҳақиқий санъат чинорлари етишиб чиқадилар, деган умиддамиз.
Баҳодир Мағдиев “Ориат доно” радиоси журналист: - Мазкур маросимда, институтимиз талабалари билан биргаликда, санъатимиз намоёндалари ҳам иштирок этишяпти. Талабаларга бакалаврлик ва магистрлик дипломлари топширилди. Шунингдек, яқиндагина бўлиб ўтган “Талаба ёшлар фестивали” ғолиблари тақдирланишди. Бугунги бакалаврлар ва магистрларни институт ректори профессор Бахтиёр Сайфуллаевич Сайфуллаев ҳам сўзга чиқиб, самимий қутладилар. У киши саҳнага биринчи бўлиб, санъатимиз намоёндаларидан Ўзбекистон Халқ артисти Яйра Абдуллаевани таклиф этдилар. Яйра опа институт тарихидан сўзлагач, бугунги кундаги муҳташамликни, ёшлар учун яратилаётган имкониятлар, Муҳтарам Президентимизнинг ёшларимизга, санъатга ва хусусан театр санъатига бўлган катта эътиборларини тилга олиб, ўзларининг миннатдорчиликларини билдирдилар. Шунингдек, санъат оламида, актёрликда биринчи бўлиб, Ўзбекистон Қаҳрамони унвони соҳиби бўлган Зикир Муҳаммаджоновни ҳам эслаб ўтдилар. Улардан сўнг, Ўзбекистон Халқ артистлари Шуҳрат Аббосов ва Турғун Азизовлар ҳам ўз табрик сўзларини айтиб ўтишди. Бу фестивалда ўз ижод намуналари билан иштирок этган ёшларимиз, келажакда санъат соҳасида ўз ўрниларига эга бўладилар ва кўплаб ютуқларга эришадилар, деган умиддаман.
Саида Вахобова
Феруза Фаттохова
Фотолар учун Сардор Азимовга миннатдорчилик билдирамиз
