FATTOHHON.COM
« Все новости
Рухшона ўзи ҳақида: -1994 йил 21 март куни туғилганман. (самимий кулиб) Тўғри, бошида ёшимни кўп яширардим, чунки, кўпчилик “ҳали кичкина экан-ку” дейишганига шундай қилганман. Ижодга қизиқиш менда болалигимдан бўлган. Ойимлар 2 ёшимда рақсга олиб борганлар. 8 ёшимдан рус тилида шеърлар ёзардим, 10 ёшимдан эса, вокалга қизиқдим, “Аладин” шоу гуруҳига қатнашдим. 15 ёшимда, 2009 йилда “Акфа медиа” санъат марказида кастингдан ўтиб, 2010 йилда шартнома тузиб, у ерда 3 йил ижодий фаолиятимни олиб бордим. 2012 йилдан, ўзим яккахон тарздаги иш фаолиятимни олиб бормоқдаман. 15 ёшимда “Акфа медиа”да илк қўшиғим ёзилган, биринчи клипим суратга олинган. Ижодда одимлаб, секин-секин, мана бугун шу кунларга эришдик.
- Кўпчилик аёл хонандалар билан суҳбатлашганимизда, болалигида санъат йўлини танлашига ота-онаси қарши бўлганлигини айтишади. Аёл киши, қиз бола учун санъат йўли оғир, деган фикрда кўпчилик қиз фарзандини санъаткор бўлишини ҳоҳлашмайди. Сизда-чи, ота-онангизни санъат йўлини танлашингизга фикрлари қандай бўлган?
- Оилада яккаю ягона фарзандман. Онам рози бўлганлар. Аммо, дадам бошида қарши бўлганлар. Лекин, кейинчалик улар ҳам, “санъат жону дили экан, яхши кўрар экан” деб рози бўлиб, кўникдилар ҳам. Онам эса, ҳар доим қўллаб-қувватлаб, ёнимда турадилар.
- Ҳозирги кунда ижодда нималар билан бандсиз?
- “Кабутар”, “Кет” деб номланган қўшиқлар чиқазгандик. Кейин эса, мана ҳозирги кунда ўзингиз ҳам кўрган бўлсангиз, “Дунё” қўшиғимизга клип суратга олдириб, намойиш қилдик. Энди ҳозир яна бир янги қўшиқ устида ишлаяпмиз. Янада мазмунли қўшиқ яратмоқчимиз. Хуллас, қизғин ижоддамиз!
- “Акфа медиа”дан кетишингиз кўплаб гап-сўзларга сабаб бўлди. Шунга ойдинлик киритсангиз?
- “Акфа медиа”дан кетишимнинг сабаби, улар бизни биринчи қалдирғоч сифатида, айнан “ўзингиз иш фаолиятингизни юритинглар, биз сизларга бошланғич ёрдамни бердик, энди бу ёғига ўзингиз эпланглар, ижодда мустаҳкамлигингизни кўрсатинглар” деган маънода, бизни чиқариб юборишди. Нима гап-сўзлар бўлганлигини билмадиму, лекин мана бир йил бўлиб қолди, ўзимиз меҳнат, ижод қиляпмиз.
- Лекин, бошқалардан кўра сиз аввалроқ кетдингиз... бошқалар сиздан кейин кетишди.
- Ўзи аслини олиб қаралса, ҳаммамиз баравар, бир вақтда чиқиб кетганмиз! Яъни, Сирожиддин, Умидахон ва мен. Лекин, Умидахон “Акф медиа”да ҳали ҳам ижодий фаолиятини олиб бормоқда. Гап биринчи кетишда эмас, гап биринчи бўлиб, ижодни давом эттириб кетиб, биринчи клип чиқарганликда! Шунинг учун ҳам, одамларда, “Рухшона биринчи чиқиб кетибди” деган гап бўлиб кетди. Чунки, у ердан чиқиб кетишимиз биланоқ дарҳол қўшиқ устида ишлаб, янги клип чиқардик. Яъни, 3 ой ҳам ўтмай, “Яқининг бўлай” ва “Не играй” қўшиқларимга клиплар чиқди. Сабаби, ижодда тўхтаб қолмаслик, мен учун жуда муҳим эди! Ўзимга билдирилган ишончни оқлаш керак эди.
- Лекин, негадир бошқалардан кўра, сиз ҳақингизда гаплар тарқалиб, ҳаммадан сиз ҳақингизда фикрлар сўралиб, бу матбуотда ёритилиш даражасигача борди. Сиз ҳақингизда ҳаттоки, сартарошларгача фикр билдиришди. Ойдинлик киритсангиз... Чиндан ҳам келишмовчиликлар бўлганмиди?
- Ўзим ҳам ҳайронман. Энди, сартарош масаласига келсак, ўша фикр билдирган сартарош қизга, мен тўғрисини айтсам, қўпол айтганда, ҳаттоки сочимни ҳам ишонмасдим. Шунинг учун ҳам, унинг фикрига ҳам, бошқа гап-сўзларга ҳам, умуман эътибор қилмадим. Агар ҳамманинг гапини эшитаверсангиз, тўғриси, умуман яшашнинг ҳам ҳожати йўқ, деб ўйлайман. Тўғри, қандайдир тушунмовчилик гап-сўзлари бўлган, газеталарда ҳам нималардир, деб ёзишган. Лекин, биласизми, русларда бир мақол бор, “оправдивается тот человек, кто не прав!”. Яъни, ноҳақ инсон ўзини оқлайди. Шунинг учун ҳам, биз ўзимизни оқлаб ҳам ўтирмадик. Жавобан интервьюлар ҳам бериб ўтирмадим. Чунки, Оллоҳнинг олдида ҳам, ота-онам, яқинларимнинг олдида ҳам, тўғриман! Ўзимнинг ҳиссиётларимни, ўзимдан нима ўтаётганлигини ўзим биламан!
- Лекин, шамол бўлмаса, дарахтнинг учи қимирламайди, дейишади. Чиндан ҳам, кимлардир билан келишмовчиликлар бўлганмиди?
- Тўғрисини айтсам, ўзим ҳам баъзида ҳайрон қоламан. Нега, биз тарафга кўпроқ тош отишади? Лекин, тўғрисини айтаман, мен ўзимга тўғриман, шунинг учун ҳам, ўзимни оқлаб ўтирмайман! Нимага ундай гаплар чиққан, билмайман. Чунки, ҳамма билан яхши муносабатда бўлганман! Энди, менда бир одат бор эди, ўзимнинг ижодим бўлса, бўлди, бошқа нарсага аралашиш одатим йўқ эди. Масалан, ҳар доим, мени ижодим, бўлди, менга бошқа ортиқча нарсалар ҳақида, кимларнингдир муаммолари ҳақида айтманглар, ғийбат ҳам қилманглар, мен ўз ишимни, ўз ижодимни ҳал қиламан, деган мақсад бўлган! Бундан кейин ҳам шундай бўлади! Мени бошқалар билан ишим ҳам, вақтим ҳам йўқ! У ерда боя айтганимдек, ҳамиша ҳамма билан жуда яхши муносабатда бўлганман! Жуда яхши хайрлашганмиз! “Худо ҳоҳласа, юзингизни ерга қаратмаймиз! Ижодимиз яхши бўлади! Ҳозирдан янги ғоялар бошлаймиз” деб, ҳаттоки маслаҳатлашганмиз ҳам! Ҳозиргача, продюсерларимиз қўнғироқ қилиб, яхши кунларига хизматларга айтиб туришади. Жон дилимиз билан бориб берамиз, чунки улар бизни кўтаришган, ижодимизни кўзга кўрсатишган. Мени ҳамма билан муомалам яхши!
- Гап-сўзлар чиқишига нима сабаб бўлди, билмадингиз ва қизиқиб ҳам кўрмадингизми?
- (самимий) Биласизми, гап-сўзларга, ким сабабчи, деб суриштиришга, уришишга, “йўқ, аслида бундай бўлганди” деб гапириб юришга тоқатим ҳам йўқ! Чунки, у мени ички дунёйим. Ўзимни ичимда нима бўлаётганлиги, ким менга зар бераётганлиги, ким тарафидан нима бўлаётганлигини ўзим биламан. Буни мухлисларга ёритгим келмайди. Чунки, ҳаммани ўзи шахсий ҳаёти бор! Ҳар қандай инсондан шахсий ҳаёти ҳақида сўрасангиз, гапириб бериб ўтирмайди! Ўзимнинг шахсий ҳаётимни ўзим ҳал қиламан, дейди.
- Ўзи келишмовчилик нимадан бўлганди? Иш бўйичамиди, ёки шахсий ҳаётмиди?
- Йўқ, шахсий ҳаёт эмас. Мен, мисол келтирдим. Иш бўйича ҳам, ҳеч қандай келишмовчилик бўлмаган. Билмайман, бу ҳасадмиди, нима? Мени ҳеч кимга зиёним йўқ, ўз ишим билан шуғулланганман! Ҳозир ҳам ижод билан бандман! Кимнидир гапини эшитмаяпман ҳам.
- Сиз ҳақингизда, очиқчасига ““Акфа медиа” санъат марказининг ёпилишига Рухшона сабабчи” деган фикрларга муносабатингиз?
- Ўша вақтда 18 ёшда бўлганман. 18 ёшли қиз, бир ўзи қандай қилиб, бунга сабаб бўлиши мумкин? Бу ҳақида ўзимга ҳам айтишди, “сиз сабабчи экансиз” дейишди. Ҳаттоки, биттаси, кимлигини айтмайман, келиб ўзимга очиқчасига шундай деди. Ўша инсонга: “Ёшим 18 да бўлса, қандай қилиб, катта бир жойни ёпишим мумкин? Шу гапларга ишонасизми, мана мени кўриб турибсиз, қўлимдан шунақа иш келадиганга ўхшайдими, ўзингизни фикрингизни, айтинг. Агар психолог бўлсангиз, гап-сўзимдан, кўринишимдан ҳам билиб олишингиз мумкин. Нима деб ўйлайсиз?”, дедим. Кейин у инсон ҳам, “мен у гапларга ишонмайман” деди. Хуллас, ундай гапларга қулоқ солиб, ҳар биттасига тўхтаб, жавоб бераверсангиз, умрингиз ўтиб кетади, деб ўйлайман. Эл оғзига элак тутиб бўлмайди! Гапирганлар қолиб кетаверади. Менимча, энг муҳими инсоннинг ўзига тўғри бўлиши, деб ўйлайман.
- Инсон қандай қилиб ўзлигини топиши ва йўқотмаслиги мумкин, деб ўйлайсиз?
- Инсон ўзини топиши учун, менимча ҳаётий синовлардан ўтиши керак. Масалан, қоқилишлар, қийинчиликлар, йўқотишлардан ўтгач, ўшандагина “мен нима учун дунёга келганман, менинг олий мақсадим нима?” деган савол туғилади ва ўзига жавоб бера олади. Кимга ишониш мумкину, кимга ишониш мумкинмаслигини билиб олади. Вақт шундай нарсаки, ҳамма нарсани сизга ўз ўрнига қўйиб беради. Бир йил давомида жуда ҳам кўп инсонларни, йўқотдик ҳам, топдик ҳам. Вақт яқин инсонларни ҳам кўрсатиб берар экан, керак бўлса сени қоралаб юрганларни ҳам. Ҳаттоки, дунёқарашингиз ҳам, ўзгариб кетар экан. Бунинг ҳаммасига вақт сабабчи.
- Сиз ўзингизни топа олдингизми?
- Ҳа, худога шукур, мен ўзимни топа олдим. Ўзимнинг энг асосий олий мақсадимни билдим, балки қилган хатоларимни ҳам билдим. Ўзимни йўқотган инсонларимни, топган инсонларимни билдим. Ким дўстиму ким душман, ким ҳар доим ёнингизда туради, шуларни билдим ва ўзимни ҳам топа олдим. Менга кўпинча, сизнинг руҳий ёшингиз, ташқи кўринишдаги ёшингиздан каттароқ, дейишади. Менимча, бунга ҳам вақт сабаб, деб ўйлайман.
- Ваъдага вафо, қоидасига қанчалик амал қиласиз?
- Авваламбор, инсон ваъда берса, ўша ваъдасини бажариши керак! Жуда ҳам кўп инсонлар, ўз ваъдасини бажармаган. Биз эса, лафз бердикми, шу лафзга жавоб берамиз! Бизнинг принципимиз шундай! Агар кимгадир, бирор нарса қилиб беришни ваъда қилсак ҳам, ўша куни улгура олмасак, кейинги кунига бўлса ҳам, албатта қилиб берамиз! Қўлимиздан келмаса, узр, қўлдан келмади, деймиз. Аммо, ваъда берилган нарсага, албатта жавоб берамиз.
- Бугунги кунда продюсерингиз борми?
- Тўғриси, жуда кўплаб продюсерлик марказлари, продюсерлар чиқишди! Рози бўлмадик. Мана ёнимда, (администраторига ишора қилиб) Фарҳод ака ўтирибдилар. Биз иккаламиз биргаликда фаолият олиб боряпмиз. Қўпол қилиб айтганда, ўз топган пулимизни, ижодимга сарфлаяпмиз. Худога шукур, кам бўлаётганимиз йўқ.
- Демак, ижодингизда Фарҳод аканинг ҳам ҳиссалари бор?
- Ҳа! Уларнинг ҳиссалари катта! Ҳар тарафлама! Бу инсонни бекорга ота-онамнинг сафига қўшмайман! Чунки, нафақат, продюсер, администратор, балки вақти келса, ака, ота ҳам бўлиб кетадилар. Шунинг учун, бу инсонга бемалол ҳамма гапларимни айта оламан. Ҳеч нарсани яширмайман. Баъзи вақтда, ёнларида йиғлаб ҳам юбораман. Шунинг учун ҳам, бу киши менга, худди оилам аъзосидек гап. Ҳамма ишларим, ҳаётим, юриш-туришим, ижодимгача ҳаммасини булар биладилар. Булардан ташқари, ҳеч ким билмайди! Булар билан танишиш жараёни ҳам жуда қизиқ бўлган. “Акфа медиа”да бирга фаолият юритганмиз. Ҳар доим бизнинг ёнимизда, акадек қўллаб-қувватлаб турганлар. Ўшанда, “Акфа медиа” санъат маркази ёпиладиган бўлгач, “Фарҳод ака, мен билан кетасизми?” деб сўраганман. Ўшанда, “биргами, бирга, охиригача бирга фаолият олиб борамиз” деб, ваъдага вафо қилган ҳолда, мана иккаламиз, бирга фаолият олиб боряпмиз.
- Хонандаликдан ташқари ҳам, бирор фаолият билан шуғулланиб кўрганмисиз?
- Либослар намойишига ҳам қизиқаман, кўпинча шундай намойишларни қолдирмасликка, боришга ҳаракат қиламан. Агар бора олмасам, интернет тармоғи орқали бўлса ҳам, албатта кузатаман! Чунки, қайси дизайнер қандай либос яратди, бу йил қандай тренд, ҳаммасини билиш керак.
- Илгари кетма-кет фильмларда роль ижро қилаётган эдингиз. Ҳозир эса, негадир бу борада сокинлик...
- “Кутилмаган қўнғироқ” фильмидан сўнг, чиндан сал сокинлик... ўша фильм, сал муваффақиятсизроқ чиқди! Режиссёримизнинг ўзлари ҳам, тан олганлар. Ўша сал сабаб бўлди. Балки, актёрлик маҳоратим ҳам унчалик зўр эмасдир? Ҳар хил сабаб бўлиши мумкин. Балки юз диапазони ролларга тўғри келмаётгандир? Энди, бу менга қоронғу. Лекин, агар амалга ошса, худо ҳоҳласа, бир фильмда бош ролни ижро қилишим мумкин! Лекин, ҳозирча, кимнинг фильми, ким билан роль ижро қилишим сир! Амалга ошиши билан биринчи бўлиб сизга хабар қиламан! Ўзи тўғриси, роль ижро қилишни жуда ҳам ҳоҳлаяпман.
- Қандай ролларни ижро қилмаган бўлардингиз?
- Енгилтак, ҳаётга енгил қарайдиган қизлар, ролларини ижро қилишни ҳоҳламайман. Ёки фильмнинг ўзида қандайдир, ноўрин жойлари бўлиб қолади. Ўша жойларини олиб ташланса, суратга тушаман, десам, “йўқ, олиб ташламаймиз” дейишса, ўша ролни рад қилган вақтларим бўлади. Лекин, ижодий юки бор ролларни, ҳатто салбийроқ ролларгача ижро қилганман.
- Танилиш сизни ўзгартирдими? Чунки, баъзида сиз ҳақингизда, “юлдузлик касали” маъносида, “сўрашмай ўтиб кетди” ҳам деганлар бор.
- “Юлдузлик касали”га келсак, вақт инсонни ўзгартириб қўяр экан. Ким дўст, ким душман ажратиб олар экансиз. Демак, айби ўтганки, сўрашмай кетасиз. Керакли одам билан сўрашар экансиз, керакмаси билан сўрашмас экансиз. Лекин, “юлдузлик касали”га чалиндимми, йўқми, буни яқинларим билади, мухлислар билади. Бу менинг қўлимда эмас. Мен, бу касалга чалиндим ёки чалинмадим, дейишга ҳақли эмасман. Энди танилишнинг ўзига келсак, бу табиийки, биринчи навбатда дунёқарашимни ўзгартирди! Инсонларни фарқлай олишни ўргатди. Илгари ишонувчан эдим, ишониб кетаверардим. Ҳамма билан гаплашиб кетаверардим. Ҳозир эса, вақт, қоқилишлар, ижод, шунчалик ўзгартириб қўяр эканки, инсонларнинг кўзига қараб, қандайлигини билиб олар экансиз!
- Ҳозирги қўшиқларингиз, илк эришган рейтинг даражангизга чиқяптими?
- Бу ҳам менинг қўлимда эмас, мен ҳал қила олмайман. Лекин, худога шукур, ёши катталар кўпинча, “Кабутар”ни сўрашяпти. Бундан албатта, хурсандман, чунки, шу манзур бўлибдики, сўрашяпти! Ёшларга келсак, “Кет” қўшиғимиз чиқди, унга клип ҳам ишламадик, лекин шу қўшиқни кўп сўрашяпти. Халқ ижод маҳсулларим манзур бўлаётганидан хурсандман.
- Жонли ижро ҳақида ҳам тўхталиб ўтсангиз. Тўйларда ҳам фонограмма ўчиб қолган ҳолатлар бўлиб турадими?
- Бу кўп бўладиган ҳолат. Кўпинча чироқ, ёки аппаратлар ўчиб қолиши, бўлиб туради. Энг қийинини айтсам, бир сафар, бир тадбирда, залда куйлаётган эдим. Попурри қўшиқ эди, кутилмаганда чироқ билан аппарат ҳам ўчиб қолди. Ҳеч ким кутмаганди. Бунақа пайт, одамлар бақириб юборишади. Шундай пайтда, жонли ижрода ҳам айтиб бераверамиз, деб битта қўшиқни жонли куйлаб бердим. Ўшанда ҳайрон қолишди, ҳаттоки Фейсбук ва Твиттерларда ҳам бу ҳақида ёзиб ташлашди. “Баракалла, жонли ижрода эплаб кетдингиз” дейишган. Менимча, ҳар бир санъаткор, ҳар доим жонли ижрода куйлаб туриши керак, деб ўйлайман. Тўйми, концертми, уйда бўлса ҳам жонли куйлаб туриши керак. Чунки, овозингиз ҳам ривожланиб, созланиб туриши керак. Агар овозингизни ишлатиб турмасангиз, овозингиз фонограммага мослашиб қолади. Ҳаётингиз ҳам фонограммадан иборат бўлиб қолади. Шунинг учун ҳам, мен жонли ижрони қўллаб-қувватлайман.
- Яккахон концертингиз қачонларга бўлиши мумкин?
- Энди, буни қачонлигини айта олмайман. Чунки, олдиндан ваъда бериб қўйиш, ёмон нарса, деб ҳисоблайман. Лекин, ҳозир шунга ҳаракат қиляпмиз. Ҳозирда янги ғоялар, изланишлар устидамиз. Бутунлай концерт режасини тузиб қўйдик, десам ҳам бўлади. Аммо, қачонлигини айта олмайман.
- Ҳаётда романтикмисиз?
- Менимча, ҳаётда ҳар бир қиз, ҳар бир аёл романтикани яхши кўради.
- Мухлисларингиздан бир ўзгача романтика қилгани бўлганми?
- (эслаб) Қизлар кўпинча суратимни чизиб жўнатишади. Бир марта бўлса, вилоятдан катта бир оила менга мухлис бўлишган. Улар атиргуллардан катта Р ҳарфини ясаб, ўшани расмга тушириб, ўша расмни менга юборишган. Жуда хурсанд бўлиб кетганман! Демак, сизни ардоқлашяпти, қадрлашяптики, шундай қилишяпти! Туғилган кунимда бўлса, жуда ажойиб бир воқеа бўлган! (самимий кулади) Ўша куни Фарҳод акага, икки йигит “илтимос, бизнинг антиқа совғамиз бор эди” деб, қўнғироқ қилишган. “Антиқа совғаси нима экан?” деб ўйлаб кетдик. Меҳрибонлик уйида концерт дастурини берганимиздан сўнг, ўша йигитлар мендан бир калла баланд, катта варракни кўтариб келишган! Унга пушти ранг лента қилиб, ўша ерга ниятларини ёзиб, “мана шуни учирасиз” деб беришган! Чиндан ҳам жуда антиқа совға бўлган! Мен учун, ҳали ҳеч ким варрак совға қилмаганди! Варрак машинага сиғмаган! Шунинг учун, нексиянинг устига қўйиб, машина ичида тўрт тарафдан қўлимизни чиқариб ушлаб олиб кетганмиз. Аксига олиб, ўша куни кучли ёмғир ёғиб берган. (ачиниш билан) Минг асрашга ҳаракат қилсак ҳам, олиб келаётганимизда, варрак ёмғирда ивиб, йиртилиб кетган.
- Қўшиғингиз тайёр бўлгач, биринчи бўлиб кимга эшиттирасиз?
- Авваламбор, янги қўшиқ чиқаришдан аввал 100 марта ўйлаб, кейин бир фикрга келаман. Қўшиқни ёзиш жараёнида эса, бутун ижодий жамоамиз, билан тинглаймиз. Тайёр бўлгач ҳам, ижодий жамоамиз билан бирга ўтириб тинглаймиз! Одатга айланган деса ҳам бўлади, ҳаммамиз, бизнинг уйга бориб, ота-онамни ўтказиб қўйиб, ўзимиз уларнинг атрофига тизилиб ўтириб олиб, бирга эшитамиз, клип бўлса бирга кўрамиз. Ҳамма ўз фикрини билдиради. Агар клипда ролни етарли ижро қила олмаган бўлсам, ота-онам фикр билдириб, танқид ҳам қилишади. Энди, биринчи танқид қиладиган ҳам, мақтайдиган ҳам ота-она!
- Плагиат қўшиқларингиз борми?
- Аввал, “Акфа медиа”да ижод қилаётганимда, 2 та шундайроқ қўшиғим бўлган. Бу “Чегаралар борми?” қўшиғи ва “Сени дея” қўшиқлари. Мен уларни аниқ плагиат, деб атамайман! Чунки, у қўшиқларни ҳавас қилиб куйлаганмиз. Биздан сўнг эса, “Чегаралар борми?” қўшиғини турк эстрада юлдузлари, худди шундай қилиб куйлашган. Шундан кейин, “турклардан ўғирлашган” деган гап чиқиб кетган. Лекин, аслида бу бошида, грекча қўшиқ бўлган. Кейин, уни Филипп Киркоров куйлаган. Кейин биз куйладик, биздан сўнг турклар ҳам куйлашди. (кулади)
- Аёл хонандаларнинг мухлислари кўп бўлади. Табиийки, уларнинг орасида севги изҳор қиладиганлари, турмушга чиқишни сўрайдиганлари ҳам бўлади. Агар мухлисингиз севги изҳор қилса, қўлингизни сўраса, унга турмушга чиққан бўлармидингиз?
- Ҳа, мухлисимга турмушга чиққан бўлардим. Нега? Чунки, ҳақиқий мухлис бўлса, сизни тушунса, доим ижодингиз кузатиб борса, энг муҳими яхши инсон бўлса, турмушга чиқишим мумкин.
- Лекин, баъзилар “мухлис фақат ижодга мухлис бўлади, улар экрандаги қиёфани яхши кўришади” дейишади.
- Лекин, масалан, сизни ҳаётда ҳам яхши кўрадиган инсонлар бор. Ҳаттоки, қўнғироқ қилиб чиқишади. Масалан, маҳалламдаги қизлар, мени ҳаётда яхши кўришади. Битта қизни, сингил қилиб олганман. У ҳам экрандаги Рухшонани эмас, ҳаётдаги Рухшонани яхши кўради. Кўпинча, ишдан келсак, югуриб келиб, кутиб олади. Ишга кетаётганимда, кузатиб қўяди. Шунчалик яқин бўлиб кетганмиз. Энди, билмадим, бу тақдир. Агар тақдир қилган бўлса, кўрамиз.
- Сиз муҳаббатга қандай таъриф берган бўлардингиз?
- Муҳаббат бу, ҳоҳ у яқин бўладими, ҳоҳ узоқ бўладими, бир инсонша содиқ ва вафодор бўлиш! Битта инсонни танладингми, ўша инсон билан умрингни охиригача яшаб ўтишинг керак, деб ўйлайман. Русларда бир мақол бо, маъноси шундай: Турмушга чиқиш бу жуда қийин иш. Агар сен ота-онанг билан уришиб қолсанг, бошқа ота-она қидираман, деб ўйламайсану, шунинг учун эр ҳам битта бўлиши керак! Шунинг учун ҳам, ҳеч қачон, бошқасини топиб кетаман, деб ўйлаш керак эмас. Вафодор бўлиш керак. Умр йўлдошини яхши кўриш ва яхши муомала қилиш керак. Аёл киши, эркак кишидан бир қадам пастроқ юриши керак, деб ўйлайман.
- Ҳозирги кунда ҳаётингизда муҳаббат борми?
- (кулади) Ҳозир, ҳаттоки нафас олишга вақт йўқ-ку... Ухлашга вақт йўқ! Ишонасизми, бугун ҳам фақат 2 соатгина ухладим. Шунчалик иш кўпки, ўзи режим бўлиб қолган. Тонгги соат 05.00 ларда ухлайман. Соат 7-8 ларда туриб, яна иш режасини тузиб, ишга отланамиз.
- Рақобат тушунчаси сиз учун?
- Менимча, рақобатнинг ўзи умуман ноўрин, деб ўйлайман. Ким биландир, кимнидир тенглаштиришнинг менимча, кераги йўқ ҳам, нотўғри иш. Сиз бошқа инсонсиз, ўша тенглаштирилаётган инсон эса, бутунлай бошқа. У бошқача ҳаракат қилган, сиз бошқача ҳаракат қиласиз. (самимий) Масалан, қайсидир қўшиқни, қайсидир қўшиққа ўхшатишса, жаҳлим чиқади. “Ҳей, аввал яхшилаб тинглаб кўр, бу бошқача куйлаган, мана бу ерини бошқача айтган. Сизлар унинг ташвишини билмайсизлар” деб тушунтираман, кейин ўша гапирганлар тинглаб кўриб, фарқини билиб, “ҳа, бошқача экан” дейишади. Шунинг учун ҳам, бундай нарсаларга юзаки қарамаслик керак, деб ўйлайман. Ҳар кимнинг ижоди, ўзига хос.
- Энг яқин дугонангиз?
- Биринчи навбатда ва ҳамиша онамлар! Ҳар доим ёнимда, ҳар доим қўллаб-қувватлаб келмоқдалар! Улардан ҳеч нарсани яширмайман! Ҳамма сирларимни айтаман, мени тушунадилар, доим керакли маслаҳатларни берадилар, доим ёнимдалар.
- Ҳаётда дўст танлашда адашган вақтларингиз бўлганми?
- Энди, ҳар бир инсон адашади. Бу ҳақида айтиб ўтирмоқчи эмасман. Уларни ҳаётимдан кетганидан, жуда хурсандман. Лекин, айтганимдек, вақт ҳамиша сизга ҳақиқий дўстларингизни қолдириб кетади.
- Болалигингизда амалга ошира олмаган қайси орзуйингизни катта бўлиб, амалга оширдингиз?
- Олдиндан бир орзуйим бор эди, устоз санъаткорлардан бирининг қўшиғини миллий йўналишда куйласам, дердим. Лекин, ўзимни ҳеч миллий йўналишда кўра олмасдим. Миллий либосларда, сочларимни ўриб, дўппилар кийиб чиққим келарди. Лекин, ўзимни миллий йўналишда синаб кўришга, бироз ишонч етишмасди. Мана ниҳоят, шу орзуйимни амалга оширдим. “Кабутар” қўшиғимда миллий либосларда, ўзим истагандек чиқдим. Шу клипда маза қилиб ишладим. Барибир миллийликка ҳеч нарса етмайди. Қўшиқ ҳам, клип ҳам барчага манзур бўлди! Ўзим ҳам орзуйим амалга ошганидан хурсанд бўлдим.
- Бегона инсон сифатида, Рухшонани танқид қила оласизми?
- (кулиб) Нега бегона одам? Яхшиси, яқинроқ одам сифатида танқид қилиб бераман. Жуда ҳам йиғлоқи! (кулади) Энди, билмадим, бу гапни қаердан олишган, лекин мени жуда ҳам мағрур, дейишади. Мен билан гаплашиб кўришмаганлар ҳам, шу гапни олишади. Ҳайрон қоламан. Энди ўзимни ёмонлашга келсак, ёмонлаб ташлайвераман. 
- Шоу бизнесдаги фаолиятингиз давомида нималарга эришдингизу, нималарни йўқотдингиз?
- Менимча, эришганларим, хонандаман, ижод қиляпман, Авраам Руссо билан дуэт куйладим. Ундан жуда кўп нарсани ўргандим. Кўп нарсани ўргатиб кетган. Актёрлик маҳорати, устоз санъаткорлар билан биргаликда фильмда суратга тушиб, ўрганиш. Устоз санъаткорлардан кўриб, улардан ўрганиб, қўшиқлар куйладим. Энди йўқотганларимга келсак, дўстларимни, яқин инсонларимни йўқотганман. Оёқдан чалишлар кўп бўлди, кўп марта йиқилганмиз. Бундан афсусланмайман, бу аксинча, ҳаётдаги мустаҳкамлигингизни билдирувчи нарса! Қандайдир, ўзингизга бўлган ишончингиз ортади. Бошқача фаолият юритасиз! Ҳеч нарсадан афсусланмаганман!
- Дуэтлар борасида?
- Жаҳонгир Позилжонов, Дилшод Холиқов, Сирожиддин Ҳожиев, бундан ташқари, Зиёда, Ойбек, Нигора, Умида билан умумий қўшиқлар ҳам айтганмиз. Энг унутилмас дуэт, бу албатта, Авраам Руссо билан бўлган. Ҳозир ҳам, кўпинча, Авраам Руссо билан интернет тармоқлари орқали боғланиб турамиз! Кўпинча, менежери Аня исмли аёл билан ёзишиб, янгиликларимиздан бохабар бўлиб турамиз.
- Рухшона ошхонада?
- Рухшона ошхона кўп киради! (кулади) Тўғриси! Жуда ҳам зўр овқат пишира олмасам ҳам, қўл телефони ва Ipad га ҳар хил рецептларни ёзиб юраман. Кўпинча, ўшаларга қараб, ҳамма керакли нарсаларни сотиб олиб, кейин уйда ойим ишдан келгунларича овқат тайёрлаб ўтираман. Ойим келганларида, “Йўғ-ей, овқат қилдингми?” деб ҳайрон қоладилар, шундай реакция бўлади ҳар доим. Ҳар доим ўзим учун, нимадир янгилик қилишга уринаман. Ҳаттоки, бемалол мақтанишим мумкин, палов пиширишни ҳам ўргандим ва ниҳоят! Лекин, манти ва хонимни ўргана олмаяпман. Ҳеч қачон тайёрлай олмасам керак, чунки тирноқлар ҳам ҳалақит беради-да!
Саида Вахобова
Феруза Фаттохова
