FATTOHHON.COM

УЛУҒБЕК РАҲМАТУЛЛАЕВ ВА ОЙХОН ИФОРЗОДА "ФОТОТАНЛОВ" ЛОЙИҲАСИДА! 22.01.2014 07:30

“Фототанлов” лойиҳаси, “Тасвир” газетаси томонидан, X Frame Media Production студияси ҳомийлигида ҳамда, Fattohhon.com интернет сайти ҳамкорлигида ўтказилмоқда.

Эслатиб ўтамиз. “Фототанлов” лойиҳаси учун “Тасвир” газетасига мухлислар томонидан юборилган суратлар орасидан ғолиб фотосурат саралаб олинади.

Фотосуратни саралаб олиш учун, ҳайъат аъзолари, таниқли шоубизнес вакиллари орасидан таклиф қилинади.

“Фототанлов” ғолибини эса, X Frame Media Production студияси томонидан фотосессия кутади!

2013 йил “Фототанлов”нинг октябрь ойи ғолибини аниқлаш учун, ҳайъат аъзоси сифатида, хонанда Улуғбек Раҳматуллаев,

телебошловчи, актриса ва хонанда Ойхон Ифорзода,

ҳамда X Frame Media Production студияси директори Иззат Юсупов таклиф қилиндилар.

Жараённи эса, фотограф Аҳрор Назиров суратга туширди.

Ҳайъат аъзолари суратлар борасида бир муддат баҳслашдилар. Октябрь ойида, “Тасвир” газетасига мухлислар томонидан юборилиб, чоп этилган барча рангли фотосуратлар билан танишиб чиқдилар.

Сўнг, ҳал қилувчи сўз хонанда Улуғбек Раҳматуллаев томонидан айтилиб, ниҳоят ғолиб аниқланди!

Демак, “Фототанлов” лойиҳасининг октябрь ойи ғолиби “Тасвир” газетасининг 17 октябрь №42 сонида чоп этилган Зуҳра Эрниязова томонидан юборилган “Туғилибмизки, уйимизга “Тасвир” келади...” фотосурати! 

 

X Frame Media Production студияси раҳбари Иззат Юсупов: - Сурат профессионал бўлмаса ҳам, унда болаларнинг “Тасвир” газетасига бўлган меҳри жуда чиройли ифода этилган! Мен ўзим ҳам “Тасвир” газетасини доим ўқиб бораман. Ўйлайманки, ҳамма “Тасвир” газетаси мухлислари, муштарийлар бу фотосуратни кўришса, ҳайрон қолишади. Чунки, бу ерда “Тасвир” газетасини анча йиллардан буён йиғилганлиги аниқ билиниб турибди.

 

Хонанда Улуғбек Раҳматуллаев: - Бу фотосуратни танлаганимни сабаби, мени бир нарса қойил қолдирди. Бу фотосуратдагилар “Тасвир” газетасининг муқоваси рангли бўлмаган вақтларидан бошлаб йиға бошлаганлар. Шунчалик шу газетани яхши кўришади ва ҳақиқий мухлислар! Кейин, суратда болалар тасвирланган. Болажонлар ҳам “Тасвир”ни яхши кўришади. Яъни, бу газетани нафақат катта балки, болалар ҳам яхши кўришади! Шунинг учун ҳам бир овоздан шу фотосуратни танладик.

 

Телебошловчи, актриса ва хонанда Ойхон Ифорзода: - Бу суратда болалар тасвирланганлиги эътиборимни тортди! Ҳақиқий болалик, болаларнинг завқланиши! Бола ҳеч қачон алдамайди, самимий ва беғубор бўлади! Болалар чиндан ҳам “Тасвир”ни қанчалик яхши кўришларини шу фотосурат орқали кўрсатиб беришган.

 

Демак, “Туғилибмизки, уйимизга “Тасвир” келади...” фотосурати эгасини, X Frame Media Production студияси томонидан фотосессия кутмоқда!

Ҳар ойда, “Фототанлов” ғолиблари аниқланади. “Тасвир” газетаси ва www. Fattohhon.com  сайтини кузатиб боринг, чунки, “Фототанлов” лойиҳаси “Тасвир” газетасида чоп этилади, лойиҳанинг барча репортаж фотосуратлари эса, www. Fattohhon.com  сайтида ҳам бериб борилади.

 

Сиз ҳам  қизиқарли фотосуратларингизни “Тасвир” газетасига юбориб туришни асло унутманг! Ажаб эмас, “Фототанлов”нинг келгуси ойлардаги ғолибларидан бири, сиз бўлишингиз ҳам мумкин!

Саида Вахобова

Феруза Фаттохова