FATTOHHON.COM
« Все новости 
22,23,24 март кунлари «Истиқлол» санъат саройида, “Ўзбекистонда хизмат кўрсатган артист” Илҳом Фармоновнинг концерт дастури бўлиб ўтмоқда.
23 март куни ҳам концерт ўзига хос файзли ўтди.
Илҳом Фармонов концерт бошланиши билан “Ватан” қўшиғини беғубор болакайлар билан куйлаб чиқиб келганидаёқ олқишлар янграй бошлади.
Қўшиқни куйлаб бўлгач, томошабинлар билан самимий саломлашган Илҳом Фармонов қўли кўксида, барча томошабинларга, мухлисларига астойдил миннатдорчилик билдирди.
Сўнг, “Бинафша” (янги талқинда), “Девонаман”, “Нимамуш”, “Самарқандга”, “Она”, “Кўзларингни яширма”, “Сурхонча”, ҳамда “Ота” қўшиқларини ижро қилди.
Ҳар бир қўшиқ учун алоҳида ўзига хос рақслар саҳналаштирилган бўлиб, либосларда рангларгача аҳамият берилган. Концерт давомида “Паризода” ва “Наврўз” рақс гуруҳлари раққосалари рақсга тушдилар.
Концертни Муҳаммаджон Бобожонов ва актриса Дилноза Кубаева олиб боришди.
Дилноза Кубаеванинг таъсирли шеърлари томошабинларни бефарқ қолдирмади.
“Она” қўшиғи вақтида чиройли қизчалар зал бўйлаб, онахонларга гуллар улашдилар.
“Ота” қўшиғини ижро қилиш хонанда учун осон кечмаганлиги сезилиб турарди. Қўшиқ олдидан Илҳом Фармонов отаси ва устози бўлмиш Шомурод ака Фармоновни ёдга олди. Қўшиқ ижроси вақти Саҳна тўридаги мониторда отасининг суратлари, ҳаётлиги вақтидаги бахтли лаҳзалари акс этган суратлар, видеолавҳалар намойиш қилинди. Томошабинлар кўзларига ёш қалқди.
Шундан сўнг, Илҳом Фармонов аввалги концертида отаси ҳаёт вақтида, унинг ўғли Исломжонни саҳнага етаклаб чиққанини ҳам хотирлади ва ўғли Исломжон Фармоновга қўшиқ куйлаши учун навбат берди.
Исломжон “СМС” ва “Дилхирож” қўшиқларини куйлади.
Унинг саҳнада ўзини эркин тутиши, самимийлиги, қувноқлиги тезда томошабинларнинг эътиборини тортди.
Шундан сўнг, кейинги блокда Илҳом Фармонов ўз рафиқасига бағишлаб, “Шодланаман” қўшиғини куйлади. Блок давомида, “Сен ва мен”, “Умр” қўшиқлари янграб ўтди.
Навбат “Лайло” қўшиғига келганда, бутун зал бу қўшиқни бирга ижро қилди.
Илҳом Фармоновнинг ўзи ҳам залга тушиб, томошабинлар билан бирга куйлади.
Концертга меҳмон сифатида ташриф буюрган машҳур меҳмонлардан Ўзбекистон ва Қорақалпоғистон Халқ артисти Озодбек Назарбековга Илҳом Фармонов микрофон тутганида, Озодбек Назарбеков “Лайло”дан бир парчани ёддан куйлаб берганлиги, барча томошабинларни янада руҳлантириб юборди!
Иккинчи блок давомида Илҳом Фармонов, яна“Ойдин Кеча”, “Қиз бола”, “Аёллар”, “Лазги” қўшиқларини ҳам куйлади.
Шундан сўнг, “Тақлидчилар” гуруҳи саҳнада сухандон Ўткир Сиддиқов, хонанда Ғиёс Бойтоев, актёр Эркин Комилов ва сўз устаси Мирзабек Холмедовнинг овозларига тақлид қилиб, саҳна кўриниши намойиш қилишди.
Учинчи блокда хонанда Илҳом Фармонов, “Соғинмаса экан”, “Хаде-хаде” қўшиқларини ижро қилгач, бошловчи Муҳаммаджон Бобожонов мухлисларнинг талаб ва истаклари ёзилган хатларни олиб чиқди.
Шундан сўнг, Илҳом Фармонов талаблар ва истакларга кўра, аввалига “Онажонинг рози қил” қўшиғини, сўнг ўзининг аввалги хит қўшиқларидан попурри ижро қилди. Кўпчилик томошабинлар хонанда билан биргаликда куйладилар.
Шундан сўнг, хонанда янги қўшиқларидан “Йўқ-йўқ”, “Қизил шапкача” қўшиқларини куйлади. Сўнг, “Яшанг” қўшиғи билан концертни якунлади.
Концерт давомидаги муҳит жуда ҳам самимий бўлиб, томошабинларнинг хонандага бўлган алоҳида меҳри сезилиб турарди.
Саида Вахобова
Феруза Фаттохова
