FATTOHHON.COM

АНВАР СОБИРОВ БУТУН ЗАЛНИ “ЛАЗГИ”ГА ЎЙНАТДИ! ТОМОШАБИНЛАР ҲАҚИҚИЙ ХОРАЗМ НАФАСИНИ ҲИС ҚИЛИШДИ! 27.03.2014 11:34

Хонанда Анвар Собиров 26,27,28 март кунлари “Истиқлол” санъат саройида ўзининг деб номланган концерт дастурини ўтказмоқда.

Дастурнинг 27 март куни ҳам ўзига хос руҳда ўтди!

Парда очилиши биланоқ барчанинг эътиборини биринчи навбатда декорация ҳайратга солди! Муҳташам Хиванинг катта бир бўлаги, барча томошабинларга дарҳол Хоразмни эслатди! Лекин, бу ҳаммаси эмас! Томошабинларни Хоразмга ҳақиқий саёҳат кутаётган эди!

Анвар Собиров концертни “Хоразм бу” қўшиғи билан бошлаганда, залда ҳақиқий Хоразм нафаси сезилди! Анвар Собиров “Тасвир” газетасига берган интервьюсидаги айтган сўзларининг устидан чиқди! МАЪЛУМОТГА ЎТИШ!

Концерт дастурига Ўзбекистонда хизмат кўрсатган артист Фатхулла Масъудов ҳам бошловчилик қилди.

Бошловчиларнинг сўзларидан сўнг, Анвар Собиров томошабинлар билан самимий саломлашгач, устозлари, эл ардоғидаги санъаткорлар Бобомурод Ҳамдамов, Каримберди Раҳмонов ва бошқаларни томошабинларга таништириб ўтди!

Шундан сўнг, хонанда биринчи блок давомида “Хато қилмаган”, “Ҳай ёрим”, “Бу кеча”, “Замонни ёмонлама”, “Жоним мани” ҳамда Озайрбайжонча қўшиқ куйлади.

Бу блокдаги қўшиқлардан айниқса, “Замонни ёмонлама” қўшиғи ўзига хос аҳамиятга эга тарона бўлди! Бу тарона, ношукур, бор нарсани қадрига етмайдиганларга қаратилган. “Шундай гўзал юртда яшаяпмиз, ҳар куни шукрона айтсак ҳам кам. Чунки, тинч ва фаровон юртда, гўзал замонда яшаётганимиз учун ҳам, кун, кун ора мана шундай гўзал концертлар, байрамлардан баҳраманд бўляпмиз” деди хонанда.

Иккинчи блок “Баҳор вальси” қўшиғи билан бошланди! Бу қўшиқни тинглаб ва унга саҳналаштирилган рақсни кўриб, барча томошабинлар ҳақиқий баҳорни ҳис қилишди.

Шунингдек, хонанда “Санъаткорга осон деманг”, “Йўқ, энди бўлмас”, “Кел”, “Индамади”, “Она”, “Ҳайрона солди” қўшиқларини куйлади.

“Санъаткорга осон деманг” қўшиғи ҳар бир касбнинг машаққати, санъаткор бўлишнинг ўзига хос мураккабликларини билдирди: “Санъаткорга осон деманг! Билар-билмай ғийбат қилманг, санъаткорга осон деманг!”

“Йўқ, энди бўлмас” қўшиғини эса, Анвар Собиров, марҳума устоз санъаткор Олмахон Ҳайитованинг вафотидан бир ҳафта аввал, бир тадбирда у билан бирга куйлаганини айтиб, “Шу қўшиқ юрагимда қолган” дея, уни концертида куйлашга аҳд қилганлигини билдирди.

“Индамади” қўшиғида эса, хонанда қўлида дутор билан фарғонача қўшиқни ҳам маромига етказди.

Учинчи блокни Анвар Собиров “Ахтарим” қўшиғини куйлаш билан бирга, йигитлар билан замонавий рақс тушиб, бошлади.

Ўзига хос ҳазил саҳна кўринишида Ўзбекистон Халқ артисти Ражаб Адашев ҳам иштирок этиб, қўшиқда айтиб ўтиладиган ҳазил сўзларни образга кириб айтиб турди.

Шунингдек, учинчи блокда хонанда “Айвонингда”, “Хаёлларимда сен”, “Оймиди-кунмиди”, “Эй гул”, “Ватан”, “Лазги” қўшиқларини ижро қилди.

Ҳулкар Абдуллаева билан биргаликда Хоразмча “Айтишув”ни ҳам қойиллатди!

“Ватан” қўшиғининг “Биздан озод Ватан қолади” сатрларининг ўзиёқ томошабинларни таъсирлантирди.

Концерт ниҳоясида Анвар Собиров “Лазги”ни куйлаб, деярли барча томошабинларни ўрнидан турғазиб юборди!

Ҳамма берилиб рақсга тушди, Анвар Собировнинг ўзи ҳам саҳнадан залга, мухлислари орасига тушиб, улар билан бирга рақсга тушди!

Концерт дастурида қўшиқларнинг мазмун моҳиятига катта аҳамият берилган.

Концерт бадиий раҳбари Оғабек Собиров

Концерт режиссёри Иброҳим Расулов

Рақслар “Тумор” рақс гуруҳи ва Хореография билим юрти талабалари бўлмиш раққос ва раққосалар томонидан ижро қилинди.

Хоразмча рақслар билан бирга, замонавий рақслар ҳам эътибордан четда қолмади.

Шунингдек, Анвар Собиров ўз шогирдларидан бирини ҳам, оммага таништирди.

Концертда сўз устаси Болтавой Тошматов ҳам ўз чиқиши билан иштирок этди.

Концертнинг 27 март кунида Ўзбекистонда хизмат кўрсатган артист Собиржон Мўминов, ҳамда “Орият доно” радиосидан Баҳодир Мағдиевлар томошабин меҳмонлар бўлишди.