FATTOHHON.COM

КУЛГУ ОРТИДАГИ ҲАҚИҚАТЛАР ВА ТАРБИЯ! «МИРЗО» ТЕАТРИ КОНЦЕРТИДАН! 05.04.2014 06:31

“Мирзо” театрининг бир неча кун давомида, “Истиқлол” санъат саройида бўлиб ўтган концерти томошабинларга манзур бўлди. Буни уларнинг тўхтовсиз олқишлари, кулгиларидан билиш мумкин эди.

Концерт дунё кулги дарғаларига ўзига хос тақлидлар билан бошланди. “Мирзо” театри, бу авваламбор театр, шунинг учун ҳам унда турли образлар бўлиши кераклигини ёдда тутган театр ижодкорлари, дунёнинг энг зўр кулги дарғалари образларида намоён бўлдилар.

Томошабинлар саҳнада Сойиб Хўжаев,

Маска,

Адриано Челентано,

Чарли Чаплин,

Юрий Никулин,

Алдар кўса,

Ҳожибой Тожибоев қиёфасидаги ижодкорларни кўришлари мумкин эди!

Чарли Чаплин номерида, томошабинлар кутган Ҳалима Иброҳимова ҳам нозиктаъб хоним қиёфасида намоён бўлди.

Сўнг, Мирзабек Холмедов “Яна биз” қўшиғи билан саҳнага чиқиб келди!

Қўшиқ ва ижодкорларнинг биргаликдаги рақсидан сўнг,

Мирзабек Холмедов ўзининг теша тегмаган кулгили ижод намуналарини бошлаб юборди. Гарчи, буларнинг бари кулгили бўлса-да, аслида ҳазил ортида, ҳақиқат ҳам бор эди.

Масалан, 9 ўғилли инсон ҳақидаги латифани олсак, чиндан ҳам отасига ҳурмат кўрсатиш тугул, машинасига ўтказишни истамайдиган, ҳаттоки бир оғиз ширин сўзини аяйдиган ва бошқа отасига ҳурмат кўрсатган инсонларни кўрса, энсаси қотиб, уларга эътироз билдирадиган ўғиллар, чиндан ҳам ҳаётда учраб туради! Шунингдек, хиёнаткор эр-хотин ҳақидаги латифа ҳам, ҳазил ортидаги ҳақиқат тарзида, чунки ҳаётда ўз оиласига хиёнат қиладиган эркаклар ҳам, аёллар ҳам бор.

Шундан сўнг, санъат билан даволайдиган санаторий ҳақидаги саҳна кўриниши намойиш қилинди ва унда ижодкорлар турли характердаги қаҳрамонларни талқин қилдилар.

Бу қаҳрамонлар орқали ҳаётда инсонларда учрайдиган турли одатлар, ҳамда муаммолар намойиш қилинди.

Баъзи одатларни қанчалик хунук кўринишини, ижодкорлар усталик билан кулги орқали етказиб бердилар.

Валижон Шамшиев ижро қилган аёл,

Маъмурбек Холмедов талқинидаги хоразмлик раққоса қиёфалари, кучли кулгига сабаб бўлди!

Айниқса, бугунги кундаги тўйларнинг ўтказилиши ҳақидаги номер Мирзабек Холмедов ва унинг ўғли Улуғбек Холмедов томонидан маромига етказиб ижро қилинди!

Бу номер билан Мирзабек Холмедов ўғил уйлантиришнинг энг камчиқим вариантини таклиф қилгандек бўлди ва томошабинлар ўзларини кулгидан тўхтата олмадилар.

Шунингдек, бу “санаторий”нинг “даволанувчи”лари орасида Мирзабек Холмедов юморга бой “Имкон” шоу ҳам ўтказди!

Шундан сўнг, Мирзабек Холмедов ҳазилдан жиддий мавзуга ўтиб, ота-онага яхшилик қилиш ҳақида ибратли ҳикоят ва ҳикматлардан сўзлади.

Мирзабек Холмедов “Ўзбекистон ва Қорақалпоғистон Халқ артисти Озодбек Назарбеков” деб эълон қилганда, томошабинлар ишониб, кучли қарсаклар янграган бир вақтда, саҳнага чиқиб келган Шукурулло Исроилов “Севиб қолмасаммиди?” қўшиғи фонограммаси билан хонандани моҳирона пародия қилди,

актриса Ҳалима Иброҳимова эса, раққоса Паризоданинг пародиясини қойиллатди!

Концерт давомида бир неча хонандалар ҳам ўз қўшиқлари билан иштирок этдилар.

Сўз устаси Валижон Шамшиев, ҳамда Аваз Зоҳир раққосалар билан боғлиқ ҳазил чиқишни намойиш қилишди.

Мирзабек Холмедовнинг янги ижод намуналаридан сўнг,

хонандалар билан боғлиқ, “Санъаткорлар болалик вақти боғчада” ҳазил номери намойиш қилинди.

Унда Шахзода, Райҳон, Озодбек Назарбеков, Гулсанам Мамазоитова, Тоҳир Содиқов, Алишер Файз, Ғиёс Бойтоев, Иброҳим Тотлисас ва бошқа хонандаларнинг болалик вақтлари, уларнинг фонограммаси билан пародия орқали кўрсатиб берилди!