FATTOHHON.COM
« Все новости
24 апрелдан “Миллион” жамоасининг концертига старт берилади! Жамоа аъзолари эса, тинимсиз репетиция жараёнлари билан банд!
Концерт “Kabulov Groop” томонидан ташкиллаштирилмоқда.
“Миллион” жамоасининг концерти 24,25,26,27 апрель кунлари “Истиқлол” санъат саройида бўлиб ўтади!
Даврон Кабулов “Миллион” жамоа аъзоси, журналист, ташкилотчи: - “Миллион” жамоамизнинг ўтган йилги концерти юзимизни ёруғ қилганди! Бу йил ҳам, камида ўша даражада бўлиши, аммо ундан яна бир қадам олдинга ташлашимиз керак. Энди, бу ҳар доим синов! Саҳнага чиқаётган инсон, айниқса ҳазил қиламан, деб чиқаётган инсон, ҳеч қачон қайси ҳазилига томошабинлар кўпроқ кулишини билмайди! Янги концерт дастурини ҳам халқ яхши кутиб олишини кутяпмиз, албатта. Шунингдек, янада профессионалликка қадам қўйишибди, дейишларини, орадан йиллар ўтиб, 40-50 ёшларга кирганда болаларимизга ҳам, “мана шундай концерт” қўйганмиз, дея оладиган концерт бўлишини кутяпман. Ўтган йилги концертдан масалан, 70-75 фоиз кўнглим тўлган. Ўзимга нисбатан, жуда талабчан, танқидий назар билан қарайдиган инсон бўлганлигим учун, бу ёмон натижа эмас. Чунки, одатда, 30-35 фоиз кўнглим тўлади. Нимага олдинга қадам ташланди, дея оламан? Чунки, биз жамоа сифатида шаклландик! Олдин, репетицияларда ҳам, ҳамма фақат ўз ролини кучайтириш учун ҳаракат қиларди! Ҳозир эса, жамоа бир-бири учун қайғуришни бошлаган! Шунингдек, жамоа ичкарисидаги атмосфера ҳам яхшиланган. Илгари, бир-биридан сал нарсага хафа бўлиб қолишлар бўларди. Ҳозир эса, иш жараёни сифатида қабул қилинмоқда. Ҳар қандай тушунмовчиликлар 5-10 дақиқа ичида ҳал бўлиб кетмоқда. Бир оила бўла олдик. Жамоамиз аъзоларини нафақат ўзларига, балки бир-бирларига ҳам ишончи бор! Энг муҳими, роль талашишлар йўқолган! Янги концерт дастуримизда, яна бир неча янги долзарб мавзуларни олиб чиқяпмиз! Бундан ташқари, концертга хонандаларни жалб этилиши ҳам, улар келиб шунчаки қўшиқ айтиб кетадиган ҳолат эмас, аксинча, иложи борича “Миллион” оиласининг аъзоси сифатида. Чунки, ўтган сафар таклиф қилинган хонандалар ҳам, бизларга бегона инсонлар эмас. Ҳаммалари, биз билан кундалик ҳаётда илиқ муносабатда бўлган инсонлар. Бизга рейтинг ҳам муҳим эмас. Биз ўзимиз яхши кўрган, ҳурмат қилган, концертимизда чиқишини истаган инсонларимизни ўзимиз таклиф қиламиз. Яширмаймиз, аввалги концертимизда ҳам, бу концертда ҳам яхшигина маблағ таклиф қилган хонандалар ҳам бўлди, аммо, шуни унутмаймизки, биз концертга билет сотамиз ва уни халқ пулига олиб тушмоқда. Демак, халқ буни эвазига яхши тамошани қабул қилиб олиши керак. Бизга ҳаттоки билетларни нархини оширишни таклиф қилишди ва шунда ҳам, бемалол томошабинлар тушади, дейишди. Лекин, рози бўлмадик. Чунки, билет нархини оширгач, худди олдинги даражадаги концерт қўйиб берсак ҳам, томошабинлар ҳеч бўлмаганда ўша билет нархини ўйлаб ҳам, “олдингиси яхши бўлганди” деб чиқиб кетиши мумкин. Шунинг учун ҳам иложи борича, билетларни нархини нормал даражада бўлишига ҳаракат қилдик. Тўғри, саройнинг ижараси нархи ошган, яна масалан, электр энергия билан таъминлаш, овоз билан таъминлаш, ҳаммасини нархи ошган! Шунинг учун ҳам, ҳоҳласак, ҳоҳламасак, билет нархини бироз бўлса ҳам оширишга мажбур эдик. Лекин, минимал даражада! Аммо, бир тарафи, биз билетларни фақат кассадан сотилган нархига жавоб берамиз. Қолаверса, билетларни фақат кассадан сотишга ҳаракат қилдик. Бундан ташқари, кассада битта одамга 4 тадан ортиқ билет сотилмади! Чунки, кимдир катта миқдорда билетларни сотиб олиб, кейин қимматроғига сотишига қаршилик қилмоқчи эдик. Энди, бу нарса қанчалик қўлимиздан келди, ёки келмади, билмадик. Шу ўринда Тошкент шаҳар ҳокимлиги “Оммавий тадбирларни ўтказиш” комиссиясига, “Ўзбекнаво” эстрада бирлашмасига раҳмат айтган бўлардим. Чунки, улар билетга эҳтиёж борлигини кўрганликлари учун ҳам, концертга яна бир сеанс қўшилишига рози бўлишди!
Бекзод Комилжонов “Миллион” жамоаси сардори, лекин доим саҳна ортида, нега бу ижодкорни саҳнада кўрмаслигимиз сабаби: - (кулиб) Сабаби, бир тарафдан ёки асосий гап ёддан чиқиб қолади, ёки қўлимдаги реквизит эсдан чиқиб қолади! Қолаверса, ҳамма ўз ишини билса, деган фикрдаман. Саҳнада хато қилишдан чўчийман. Шу вақтгача саҳнага чиқиш фикри бўлмаган. Лекин, агар саҳнага чиқмоқчи бўлсам, жамоа аъзолари “йўқ”, дейишмайди! Аммо, ўзимда ҳоҳиш йўқ! Жамоамиз аъзоларидан Отабек Мирзахоловнинг бир гапи бор, “сиз саҳна ортидасиз, шунинг учун ҳам, биз саҳнада хотиржаммиз!”. Чунки, булар саҳна ортидан кирганда, мен уларни кейин саҳна кўринишига тайёрлаш учун, тайёр тураман! Янги концертга ҳам оз қолди, асосий қийинчилик бу масъулиятда бўлмоқда! Ҳамма тайёргарликларни яхши қилиш учун ҳаракат! Қолаверса, тайёргарликни аввалги концертларимизга нисбатан вақтлироқ бошлаганмиз, аммо бизга яна 100 фоизлик натижага етишиш учун барибир вақт етишмаяпти! Бу галги концерт, умуман аввалги концерт атмосферасини эслатмаслигига ҳаракат қиляпмиз! Роллар танлашда, агар битта ролга бир неча иштирокчи мос келса, ўртага ташлаймиз, жамоа аъзоларининг ярмидан кўпи тасдиқлашса, қабул қилинади.
Алишер Ботиров “Миллион” жамоаси аъзоси: - Концертда кучли номерлар кўп бўлади, қайси бири энг кучлиси эканлигини мухлислар аниқлашади! Олдиндан биттаси, энг кучлиси бўлади, деб айта олмаймиз. Фикримча, умумий чиқишларни янада ўзгача бўлади, деб ўйлайман. Ўтган йилги концертда камроқ репетиция қилганмиз, лекин ҳаракат қилганмиз, шиддат билан чиқиб, мухлисларга ёқадиган яхши номерлар қилганмиз! Бу гал вақтлироқ ҳаракат бошладик, иложи борича, ўтган йилгидан ҳам яхши чиқишлар қилишга ҳаракат қилмоқдамиз! Ҳар бир иштирокчимизни ўзига яраша юмори бор! Роль танланаётганда ҳам, ўзига, ёшига, типажига мос роллар танланади! Ролларни ҳам ўзимиз тақсимлаймиз! Ҳар куни тунги 02.00-03.00 гача репетиция билан бандмиз. Чунки, кўпчилигимизнинг ўз ишимиз бор! Охирги 2 кунга ишдан жавоб олганмиз. Концерт зўр бўлади, деган умиддамиз!
Агар кайфиятингизни ўта юқори даражага кўтармоқчи бўлсангиз,
24,25,26,27 апрель кунлари “Истиқлол” санъат саройида “Миллион” жамоасининг янги концерт дастурини асло ўтказиб юборманг!
Концерт учун Америка Қўшма Штатларидан қайтган Отабек Мирзахолов, жамоа аъзолари Миркомил Мусаев, Умид Ҳайдаров, Умид Умаров, Аҳмад Темиров, ҳамда жамоадаги ягона қиз Шаҳлонинг концерт олди фикрлари ҳақида, эртага 24 апрель куни тонгда!
Саида Вахобова
Феруза Фаттохова
Фотолар учун Дилмурод Манноповга миннатдорчилик билдирамиз
