FATTOHHON.COM
« Все новости 
- Бугун жонли ижродаги концертингизнинг якуний куни ўз ниҳоясига етди! Ҳозиргина саҳна ортига қайтдингиз. Айни вақтда нималарни ҳис қиляпсиз?
Озодбек Назарбеков: - (самимий кулиб) Бир тарафдан хурсандчилик, иккинчи тарафдан соғинч, яна! Наҳотки тугади? Чунки, жонли ижродаги концертни чиндан ҳам жони, юраги бўлади! Ўша юраги уриб турганлиги учун, бир кун ҳам зерикиш бўлмади! “Тугамасаю!” деган фикр бўлди! Кеча, айниқса, бугун! Наҳотки, 2 кун қолди, бир кун қолди, дедик. Тўғри, катта ғалабага эришилди! Лекин, яна жонли ижрода куйлашнинг хумори бошланди!
- Концертда ўзингиз кутган натижа бўлдими?
Озодбек Назарбеков: - Тўғриси, мен кутгандан аъло бўлди! Энг муҳим жиҳати шу эдики, концертда яхлитлик бўлиши керак эди. Режа шундай олиндики, биринчи планда солист бўлиши керак, ҳамма нарса унга хизмат қилиши, тўлдирувчи вазифасини бажариши керак эди. Жумладан, раққосалар ҳам, декорация ҳам, ҳамма-ҳамма нарсалар. Менимча, шу нарса амалга ошди!
- Концертнинг қандай қийинчиликлари бўлди?
Озодбек Назарбеков:- Фонограммали концертдан кўра, осон ўтди! Қийинчилик деярли бўлмади! Қайтанга жуда енгил ва эркин, бунинг устига ўзингиз кўрган бўлсангиз, бошидан бошлаб, импровизация бўлди! Ҳаммаси фикрлар ҳам, гаплар ҳам, ўзи туғилиб, жараёнда, концерт давомида шаклланди. Унақа олдиндан ишланиб, “мана шу ерда бу гап гапирилади, бу ерда бунақа”, деган нарсалар бўлгани йўқ! Ўзи ҳаммаси жараёнда туғилиб, жой-жойига ўрнашиб қолди. Секин-секин кунлар давомида мустаҳкамланди. Жойига ўрнашиб, қанақадур ҳар сафар, олдингисидан кам бўлмаган эффект берди, гаплар ҳам, бошқа нарсалар ҳам!
- 6 апрелдан 23 апрелгача бўлган концерт кунларининг ҳар куни сиз учун қандай ўтди?
Озодбек Назарбеков:- Концерт кунларининг ҳар куни ўзгача ўтди! Хилма-хиллик бўлди! Қолаверса, бу мухлисларга ҳам боғлиқ бўлди. Қайсидир кунлари руҳият баланд бўлди. Лекин, шахсан мен, 13 апрель санъаткорлар келган кундаги руҳиятни топа олмадим. Ўша куни руҳият ҳам, жуда баланд бўлганди! Шахсан мени ўзимнинг руҳиятим, мухлисларнинг руҳияти! Табиийки, бу энди концертнинг нозик-нозик, оддий халқ илғамайдиган томонларини ҳам илғайдиган мухлислар кўплигидан, уларнинг ҳарорати бошқаларга ҳам кўчиб турди! Уларнинг эмоцияси бошқаларга ҳам таъсир қилди! Чунки, санъаткор барибир бекорга ижодкор бўлмайди. Кўпчилик илғамаган нарсаларни илғагани учун ҳам, ижодкор бўлади!
- Бу юбилей концерт ва қолаверса, жонли ижрода куйлаш бўйича чинакамига рекорд қўйдингиз! Ҳаммани бир савол ўйлантираётганлиги аниқ! Қандай қилиб, бунга эриша олдингиз?
Озодбек Назарбеков:- Тўғрисини айтганда, таваккал қилдим! Режада ҳам бор эдию, аммо бу таваккалимизнинг амалга ошишининг бир энг муҳим сабаби шу бўлдики, бир оз муддат аввал, студиямиз ёниб кетганди... Деярли, 50 фоиз репертуар тайёрланганди, ёзиб қўйилган, фикрлар, ғоялар, концерт материаллари, ҳаммаси ўша студияда йиғилган эди... Бир кунда ёниб кул бўлди, ҳеч нарса қолмади... Бу эса, 100 фоиз жонли ижродаги концертга сабаб бўлди! Чунки, ўша пайтдан бошлаб, яна қўшиқлар устида ишлаб, аранжеровка қилиб, ижро қилиб, студияга кириб ёзиб, созандалар чалиб, то бу ерга келгунча, ҳамма ишни йиғиштириб қўйиб, фақат шу билан шуғулланиш керак эди! Олдимиздаги биринчи вариант, яна бошидан бошлаб, ҳаммасини қайта ишлаш, ёки иккинчи вариант созандалар билан биргаликда ўтириб, ишлаб, жонли ижрода куйлаш бўлди! Жонли ижро, осонроқ кўчди, сабаби, кўп эски хит қўшиқлар бўлганлиги учун ҳам, созандаларга таниш, чалиб юрган, қулоғига ўрнашганлиги учун ҳам, биринчи тез-тез эски қўшиқларни тиклаб олдик! Ундан кейин, янги қўшиқлар устида ишладик. Кўнгилсиз воқеа ҳам, барибир яхшиликка бўлди!
- Шунча кун давомида жонли ижрода куйлай олганингизни, овозингизни шунча кун жонли ижрога етказа олганингизнинг сири нимада бўлди?
Озодбек Назарбеков:- (самимий кулиб) Бу мухлислар эътиборидан! Биринчи кунданоқ, мухлисларнинг жонли ижрога муносиб бўлган муносабати ҳам, куч-ғайрат бағишлади! Умумий кайфият, бутун дастур давомидаги руҳият, мени ушлаб турди! Руҳият жуда баланд эди! Менинг ҳаётимда ҳали учрамаган, ўзимда ҳеч қачон бунақа руҳиятда концерт ўтмаган! Ўша руҳият мени ушлаб туриб, куч берди! Ҳаттоки, шундай кунлар ҳам бўлдики, ухлай олмадим. Масалан, ўша санъаткорлар келган 13 апрель куни, бир кун олдин, деярли ухламадим! 3 соатгина ухладим холос. Кун давомида эса, 2 та сеанс концерт бор эди! Кундузи ва кечқурун! Концерт залга келдим, шамоллаганман, овозим бўғилиб ётибди, кундуз куни эса, концерт, ҳамма санъаткорлар йиғилишган! Билмайман, ўша лаҳзаларда қаердан менга бундай куч келди? Ўша куни, ўша концерт кўтаринки руҳда ўтди! Мен яна бир карра амин бўлдимки, томошабинлар муносабати, жуда ҳам катта аҳамиятга эга экан! Ўша куни томошабинларнинг муносабати, биринчи қўшиқнинг ўзидан билинди! Ҳали ҳам эсимдан чиқмайди, саҳнага чиққанимда қарсак бошланган бўлса, биринчи қўшиқ тугаганда қарсак тўхтади. Унгача ҳамма тинимсиз олқишлади ва ўшанинг ўзида менга куч келди! Бўлмаса, шундан 5 дақиқа олдин, саҳна олдида турганимда, ўзимнинг аҳволимни ўзим билардим... Бу аҳволда концертни қандай ўтказаман, деб тургандим. Шундай ҳолатлар ҳам кечди! Бундан, яна бир карра амин бўлдим, демак, инсонларнинг муносабати, санъаткорга бўлган эътибори, катта аҳамиятга эга экан!
Саида Вахобова
Феруза Фаттохова
Фотолар учун X Frame media production студияси Аҳрор Назировга миннатдорчилик билдирамиз
