FATTOHHON.COM

“МИЛЛИОН” ЖАМОАСИ, МИЛЛИОН ФОИЗ ЮҚОРИ КАЙФИЯТ! 24.04.2014 15:06

24 апрелдан бошлаб, 27 апрелгача “Истиқлол” санъат саройида “Миллион” жамоасининг янги концерт дастури ҳақида, жамоа аъзоларининг ўзлари қандай фикрдалар?

Ваъда қилинган фикрлар:

Отабек Мирзахолов айнан «Миллион» жамоасининг концерти учун Америка Қўшма Штатларидан қайтган, актёр ва режиссёр: - Концертнинг репетициясига, концертга бир неча кун қолганида қўшилдим. Лекин, жамоага етиб олишга ва дастурга улгуришга ҳаракат қилдим. Сафарда бўлганим учун ҳам шундай бўлди. Вақт озроқ бўлгани учун менга бошқаларга нисбатан бироз қийинроқ бўлди. Қолаверса, сафардан қайтганим учун муҳитга кўникишим ҳам қийинроқ кечди. Ўтган галги “Миллион” жамоасининг концертидаги чиқишимдан сўнг, “Отабекни Миржалол Қосимов қаматиб юборибди” деган нотўғри миш-мишлар ҳам тарқалиб кетди. Чунки, сафарга кетганим учун, жамоа сафида кўринмай қолганимга ҳам шундай гап-сўзлар чиқди. Шуни айтиб ўтмоқчиман, бу ҳаммаси миш-миш! Аслида, ҳаммаси жойида! Ўзи Миржалол Қосимов билан ҳаётда кўришмаганмиз, лекин ҳурмат қиламан. Энди, бу янги концерт дастуримизда ҳам, илгари ижро қилмаган, ўзгача образларда чиқаман. Мен ўзим ҳар бир ижро қилаётган ролимни яхши кўриб ижро қилишга ҳаракат қиламан. Бирортасини яхшироқ чиқибди, деб ажратишни ёмон кўраман. Концертдаги санъаткорлар билан боғлиқ ҳазилларга келсак, барчаси ҳазил, биздан аввал ҳам устозлар ҳам, санъаткорлар ҳақида ҳазиллар қилишган. Санъаткорлар ҳазилларимизни тушунишади.

Умид Ҳайдаров “Миллион” жамоаси аъзоси: - Энди ҳар бир ижод намунангизга баҳони ҳам мухлисларнинг ўзлари беришади. Янги концерт дастурида, ҳаммамиз янги қиёфаларда, янги образларда чиқяпмиз. Қайтарилиш, такрорланиш бўлмайди. Номерлар устида кўп ишлаганмиз, лекин қандай қабул қилиниши, мухлисларга ҳам боғлиқ. Биз максимал даражада ҳаракат қиляпмиз. Ўтган галги концертдан 1000 фоиз кўнглим тўлганди, ўзимизга нисбатан ишонч янада ортди! Эндиликда, бу фоизларни гуруҳимиз номига мос қилиб, миллионга кўтариш ниятидамиз!

Миркомил Мусаев “Миллион” жамоасининг энг жиддий характердаги аъзоси: - Репетициянинг охирги кунигача, концертда аниқ нима бўлишини айтиб бўлмайди! Чунки, бизнинг жамоамизда, ҳар бир образни ижро қилиш учун, тўғри маънода, соғлом ички рақобат мавжуд. Бу эса, катта ютуқ, сабаби, бу рақобат ижобий бўлиб, бизни ўз вазифамизни янада яхши бажариб боришимиз учун, пишитиб бораверади. Биз одатда, йилда 2 марта концерт берамиз. Аввалги концертимиз ноябрь ойида бўлган бўлса, мана кейингиси апрелда бўлмоқда. Бу жуда қисқа муддат, қолаверса ҳазиллар топиш учун ҳам. Бу борада анчагина қийналдик, лекин бир нарсага аҳд қилдикми, албатта, бунинг уддасидан чиқишимиз керак! Қолаверса, Отабек Мирзахоловнинг сафимизга қайтиши ҳам бизга ижодий куч бўлди. Чунки, жамоанинг қайсидир аъзоси бўлмаса, барибир сезилади! Ҳар бир инсоннинг ўз ўрни, ўз кучи бор! Албатта, ижодий қийинчиликларни ижобий ҳал қиламиз! Бир гал саҳнада шахсан ўзимда қизиқарли воқеа бўлганди. Битта шеърни кўпроқ қайтарсангиз ҳам, ёдда қолиши қийин бўлар экан. Саҳнада “Кеча келгумдир дебон” деб бошланадиган ғазалга пародия шеър айтишим керак эди. Асосий ғазал мияга ўрнашиб қолиб, пародия шеърим ёддан чиқиб қолган! Пародия ўрнига ҳам, оригинални айтиб юборганман. Жамоадошлар сезиб ёрдам беришган. Лекин, мен импровизация қилиб юборганман, томошабинлар сезишмаган. Саҳнада имровизация бўлиши табиий. Қолаверса, баъзи номерлар устида жуда кўп ишлаганимиздан ўзимизга ҳам зерикарли бўлиб қолади ва баъзида дастурдан олиб ташлаймиз. Балки, шунда ўзимиз учун қизиқ бўлмаса ҳам, томошабинлар учун жуда қизиқарли бўлган номерларни, ўзимиз бўшроқ деб, олиб ҳам ташлагандирмиз...Янги концерт дастуримизда ҳам, санъаткорлар ҳақидаги ҳазилларимиз бор, лекин барчаси беғараз. Олдиндан узр сўраймиз, агар қаттиқроқ бўлиб кетса. Биз ўзимиз ҳам санъат ичидамиз ва бошқаларнинг ҳам санъатини ҳурмат қиламиз.

Аҳмад Темиров “Миллион” жамоаси аъзоси: - Ҳар бир концертда, ўзимизга топширилган ҳар бир ролни бор маҳорат кучимиз билан ижро қилишга ҳаракат қиламиз. Ролнинг катта-кичиги бўлмайди! Ўтган галги концертда, “Техаслик Жорж” қиёфасида чиққандим. Бу гал, эса Ҳиндистонлик Рохит Меҳра бўламан! Уни ҳам яхши ижро қилишга ҳаракат қиламан. Умуман, жамоамиздаги ҳар бир иштирокчининг роллари, ўзига хос бўлади! Бир гал менда қизиқ воқеа юз берган, кутилмаганда, саҳнада гапираётган жумламнинг сўзлари бир-бирига мос келмай қолган.

Умид Умаров “Миллион” жамоаси аъзоси: - Бу галги концертда ҳам Ота ролида чиқаман. Жамоамизда ким қандай образга мос тушишига қараб, типажга қараб роллар тақсимланади. Ўтган йилги концертимизда, умумий ишлаганимизда, отанинг ётоқхонага келадиган номеримиз бор эди. Умумий жамоа бўлиб ишлаганимиз учун ҳам, ўша номеримиз менга энг ёққан номерлардан бўлган. Ҳаммамиз биргаликда ишлаганимиз учун ҳам, жуда яхши чиққан, деб ўйлайман. Томошабинларга ҳам жуда манзур бўлган. Лекин, қайси номер зўр чиқишини олдиндан билиш қийин. Қолаверса, фикрлар қарама-қаршилиги ҳам мавжуд. Шунинг учун ҳам, эркин рақобат бўлса, томошабин талабига мос, сайқалланган ижод намуналарини тақдим қиласиз. Бундан ташқари, сценарийдан чиқиб кетиш, имровизация ҳолатлари ҳам бўлади. Ўзимда бир гал шундай ҳолат ҳам бўлган, Бухорода концерт берганимизда, саҳна ортида гаплашиб, ўзимнинг саҳнага чиқадиган жойимда, чиқмай қолганман. Кейин қайта чақиришгач, чиққанман. Ҳамма ўзини кулгидан тўхтата олмаган. Лекин, одатда ҳаммамиз дастурни деярли ёдлаб оламиз, ҳамма бир-бирини номерлари, гапларигача билади. Чунки, бир-биримизни керак вақтида саҳнада ҳам қўллаб ҳам юборамиз. Қолаверса, баъзида кўнглингизга бироз ўтиришмаган роллар ҳам бўлади, аммо жамоа учун, ўша ролда чиқасиз. Энди, бир сўз билан айтганда, чемпион бўлиш осон, уни ҳимоя қилиш қийин! Биз ҳозир чемпионликни ҳимоя қилиш давридамиз!

Шаҳло жамоадаги ягона аёл иштирокчи, “Миллион” жамоасининг рақобатчиси йўқ аъзоси: - Бу жамоада ишлаш мен учун жуда ҳам осон. Жамоадошлар билан биргаликда ишлаб, уларнинг ёрдами билан шу даражага эришдим. Жамоадошларимнинг ҳаммалари менга акамдек, укамдек бўлиб қолишган. Саҳнага чиққанимда бирор камчилигим бўлса, ўзлари тўғрилашади. Тўғри ижод ҳам осон эмас, чунки ҳар хил роллар ижро қилишга тўғри келади. Баъзи ролларни ижро қилганингиздан кейин, баъзи сизни билмаганлар бошқача кўз билан ҳам қарашади. Чунки, саҳнага нафақат ижобий характерли, балки салбий характерли инсонларнинг ҳам ролларини олиб чиқамиз. Жамоада ягона аёл кишиман, саҳнага ҳозирги замондаги ҳар хил характерли аёлларнинг қиёфаларини олиб чиқишга ҳаракат қиламан. Бунда албатта, жамоадошларимнинг ёрдамлари жуда ҳам катта. Ҳаммаларига раҳмат. Ҳозирда мен оилалиман, битта қизим бор, оиламдагилар касбимни тушунишади ва доим қўллаб-қувватлашади. Ўзим ҳам ижодга болалигимдан қизиқиб келганман, позитив инсонман. Қизиқишларим туфайли, талабалик вақтимдан жамоага аъзо бўлиб, шу бугунги даражага етиб келдик. Яқинларим чиқишларимни кўриб хурсанд бўлишади, тушунишади. Ўзи “Шоввозлар” жамоасидан чиққанман, ҳозирда “Миллион” гуруҳи билан биргаликда ишлаяпмиз. Жамоадагиларнинг ҳар бирини ўзига яраша характери бор! Характеримиздан келиб чиқиб, биз бир-биримизни ёдлаб олганмиз. Ҳаммамиз биргаликда, бир жамоа бўлиб ишлаймиз!

Бекзод Комилжонов жамоа сардори: - Имровизация, бизда фақат яхши тарафга хизмат қилади. Саҳнада, кузатишим бўйича, фақат 10 фоизча импровизация кетади. Одатда, дастурда 100 та ҳазил бўлса, уларнинг 100 таси ҳам, биринчи куни намойиш қилинади. Лекин, агар томошабин тарафидан яхши қабул қилинмаса, баъзилари кейинги концерт кунлари олиб ташланиши ҳам мумкин. Лекин, концерт дастури кундан кунга шаклланиб, янада қизиқарли бўлиб боради! Бир сўз билан айтганда, концертнинг ҳар бир куни ўзига хос! Одатда, мендан қайси куни қизиқарлироқ бўлади, деб сўрашади. Аммо, бу саволнинг жавоби, ҳар бир кун ўзгача ва қизиқарли бўлади! Чунки, жамоадошлар ҳар куни ўз ролларини ўша бир хил роль бўлгани билан янада бойитиб, ҳар хил қилиб ижро қилишади! Бу янги концерт дастуримиздан кутилаётган энг асосийси, баҳорги аъло кайфият!