FATTOHHON.COM
« Все новости
Собиқ “Беном” гуруҳи, ижодкорлар Сарвар ва Комил, қўшиқ куйлаш ва бастакорликдан ташқари, эндиликда, кино оламида ҳам ўз маҳоратларини синаб кўришди. “Юрак йиғлар” фильми, Сарвар ва Комилнинг кино оламидаги илк ижод маҳсулидир. Фильмдаги бош ролларни ҳам Сарвар ва Комилнинг ўзлари ижро қилишган. Шунингдек, фильм саундтрекларини ҳам улар куйлашди. Шунингдек, фильм учун Шахзода ҳам саундтрек куйлади. Бор ижодий кучини мана шу фильмга берган Сарвар ва Комил эса, маълум бир муддат фильм туфайли, хонандаликда кичик танаффус қилиб туришларига ҳам тўғри келди. Эндиликда эса, фильм катта экранга чиққач, Сарвар ва Комил тинимсиз ижод билан банд бўлиб, кетма-кет янги тароналарни тақдим эта бошлашди.
- Сизлар бир нечта фильмларга саундтрек ижро этгансизлар, ёзгансизлар ва мана ўзингиз ҳам кино суратга олдингиз ва унда ўзингиз ҳам роль ижро этдингиз. Бу жараён қандай кечди?
Комил: – Менда бу орзу болалигимдан бўлган. Қачон бўлса ҳам, битта бўлса-да фильмда роль ижро этиш! “Қачон бўлса ҳам, Ромео ролини ижро этаман”, дердим болалигимда. Кейин ўзбек кино ижодкорлари томонидан “Ромео ва Жульетта” фильми суратга олингандан сўнг, бу орзу босилиб қолди. Сўнг, “Тарона Рекорс” студияси томонидан кино олиш ғояси илгари сурилди ва менинг орзуйимга йўл очилди. Актёрлик орзуси хонандаликдан ҳам кучли орзу эди. Ҳақиқатдан ҳам, актёрликни жуда яхши кўраман! Ҳар доим Сарварни “киноларда ҳам роль ижро қилайлик” деб ундаб келардим. Вақти-соати энди етибди, шу ишга қўл урдик, мана роль ҳам ижро қилдик. Биринчи ролимиз бўлгани учун, олдиндан узр сўраймиз. Қўлдан келганча ҳаракат қилдик, баҳосини халқ беради.
Сарвар: - Албатта ҳар битта санъаткор санъатни ҳар битта қиррасида ўзини синаб кўради. Чунки, санъат ўзи кўп қиррали. Рассом ҳам, бастакор, хонанда, актёр ҳаммаси санъаткор ҳисобланади. Санъатнинг чегараси йўқ бўлгани учун биз ҳам ўз қобилиятимизни актёрликда синамоқчи бўлдик. Тўғри халқ ичида “хонанда қўшиғини айтсин, роль ижро этмасин” деган, гап ҳам юради. Лекин, санъат олийгоҳида шундай факультет бор, актёрликни ҳам хонандаликни ҳам, биргаликда ўқиб ўрганиб чиқади. “Эстрада актёрлик” факультети, сухандонликкача ўргатади. Мен ҳозирда шу олийгоҳнинг 2 курс талабасиман (кулади). Энди, “Юрак йиғлар” фильмини қандай бошлаганимизга тўхталсак, бу фильм сценарийси 4 йил давомида ёзилди. Бу жараёнда талашдик, уришдик ҳам. Комил билан иккимиз биргаликда ёздик. Кейин анча вақт режиссёр қидирдик. Бирининг вақти тўғри келмаса, яна бирини қанақадир бошқа ишлари чиқиб қолади. Ниҳоят, Акром Шохназаровга тўхталдик. Сўнг, Акром ва ўзимиз ишни бошладик. Суратга олиш жараёни 6 ой давомида кечди. Бу 2 ой тайёргарлик жараёни, 4 ой суратга олиш жараёнларидан иборат бўлди. Жуда ҳам қийин кечди. Роль ўйнаш, актёрлик, чиндан ҳам осон иш эмас экан! Ўзига яраша меҳнати ва оғирлиги бор экан. Лекин, ўзимиз ёзганимиз учун ва ўзимизнинг ҳаётдаги ролимиздан бўлгани учун ҳам сал бўлса-да, ижро этиш енгил бўлди. Айтиб ўтганимиздек 4 йил давомида ёзганимиз учун ҳам, фильм давомида кетадиган мусиқаларни битта–битта ёзиб борганмиз. Фильм давомида ишлатамиз, деб ёзиб келганмиз. Ўша мусиқалар орасида Шаҳзода учун ёзганимиз, “Юрак соғинар” фильм саундтрекларидан бири бўлди. “Юрак маҳзун” деган қўшиғимиз ҳам шу фильм учун ёзилган. Фақат сал вақтлироқ чиқариб юбориган, лекин керак жойида фильмда ишлатдик.
- Нега айнан ёш ижодкорлар билан ишладингизлар?
- Энди мен бу гапим билан ёши катта ижодкорларга тош отиш ниятим йўқ. Лекин, инсон бир иш билан қанча шуғулланиб келаверса, секин совиш пайдо бўлади. Янгича ғоялар, янгича ёндошувлар йўқ бўлиб қолади. Яъни, ҳаммасини ишлатиб бўлади. Ёш ижодкорларимиз бўлса, кинони кузатиб юрадилар. Ичида ёниб турган нарсаси бўлади, уларнинг. Ўзимни кўрсатаман, деган мақсадда янгича ғоялари бўлади. Шу учун, бизда ҳамма режиссёрдан тортиб, ҳаммаси ёш дебютантлар!
- Нима учун айнан бош ролда айнан Зарина Низомиддинова?
- Зарина Низомиддоновага келадиган бўлсак, бу ўша 4 йил давомида сценарий ёзилганда ўша пайтнинг ўзида бош ролда Зарина кўрилган. Зарина учун ёзилган бу роль. Ундан бошқа актриса кўрилмаган.
- Заринани ўзи бу таклифга нима деди?
- Жуда ҳам хурсанд бўлди. Зарина Низомиддинова билан ўзи бир кўрсатувда танишиб қолдик. Характерларимиз тўғри келдими, яқин дўстлашиб кетдик. Дўстлашганимиздан сўнг, бизларга қўшиқлар ёздирди. Мана “Афсонавий” деган қўшиқлари ҳам чиқди, яна бошқа қўшиқларини ёзиб бердик. Шундан кейин, биз “мана шундай бир кино бор. Шундай роль, бу роль сиз учун ёзилган” деб, таклиф қилдик. Улар хурсанд бўлдилар, мавзу ҳам уларга ёқди, “хўп, ўзим ўйнайман” дедилар. “Агар бошқа актрисани олсангиз, хафа бўламан” дедилар. Чунки, режиссёрдан тортиб продюсергача бошқа актрисани олиш ниятлари бор эди. Биз бўлса, бу роль Зарина учун ёзилган, деб Заринани тасдиқладик.
- Роль ижро қилиш Комилнинг болаликдаги орзулари экан. Нега бош ролга сизни ролингизга, бошқа актёр танланмади?
- Агар роль фақат Комил учун ёзилган бўлганда, мен бу кино учун ҳиссамни қўшишга ҳаракат қилмаган бўлардим. Шунинг учун, болалар ҳам қизиқтириб қўйишди. Кино зўр реклама, ҳозир мана мисол учун, рақобат кучайган даврда бошқача рекламадан фойдаланмоқчи бўлиниб, кинога қўл урилди. Айнан бош қаҳрамонлар ҳам, ўзимиз бўлиб, ундаги роль ҳам, биз ҳаётда қандай бўлсак, кинода ҳам ўзимизга яқин характердаги образлар бўлди.
- “Юрак йиғлар” фильмида яна бир гуруҳ иштироки бор экан. У гуруҳни сизларга қандай алоқаси бор?
- “Диёр” гуруҳи, бизлар билан ҳамкорликдаги гуруҳлардан бири. Ҳозирда биз уларга қўшиқ ёзиб бермоқдамиз. Битта альбомга шартнома бўлган. Шу сабаб, уларга қўшиқлар ёзиб бермоқдамиз. Лекин, у бола ва қизнинг типажи ҳам, айнан биз ҳоҳлаган қиз ва болага тушди. Кастингда бошқа актёр ва актрисани кўрганимизда, у ролларга тушмади. Юлдуз ва Жамол мана биринчи марта роль ижро этаётган бўлсалар ҳам шундай ишонарли ижро этишдики, биз ўзимиз кўриб ҳавас қилиб қолдик. Юлдуз ҳам ўз ролини жуда чиройли ижро қилган, Жамол ҳам. Улардан ташқари, ўзимизнинг админстраторимиз ҳамда “Эркалай” клипимизда чиққан Бахрул Қурбонов ҳам, жуда юки бор роллардан бирида чиқди. Унинг ролини юки, кинода жуда ҳам катта. Бу роль устида жуда катта тортишувлар бўлди. Чунки, бу бола ўзингга ўхшайди, дейишди. У сенга қарама-қарши образда бўлиши керак, дейишди. Хуллас, барибир йўқ, деб уни ўша бош қаҳрамонлардан бири, яъни менинг ўртоғим ролида қолдирдик. Чунки, бу роль учун ҳам жуда катта кастинг бўлди, лекин ҳеч ким у ижро қилгандек ижро қилиб бера олмади. Бунга жуда ҳам қийин бўлди, чунки ролидан ташқари, картина директори ҳам ўзи эди. Кечалари ухламай ишлади!
- Суратга олган фильмингиз, айнан қайси жиҳати билан томошабинларга қизиқ бўлди, деб ўйлайсизлар?
- Шу вақтгача фильмни кўрган кўп инсонлар жуда илиқ фикрлар билдиришди. Бадий кенгашдаги инсонлар, бир нечта режиссёрлар ҳам. Нима, дея олишимиз мумкин, биз янгилик ярата олдик, деб ўйлаймиз. Чунки, Тарона Рекорс” компаниясида бадий раҳбаримиз бор. Улар учун бу кино қанақадир совға бўлди! Бизларга ишонинг, агар охирида бирор жойи ёқмаса, биз бориб қайтадан ўша жойини съёмка қилиб келамиз, деб айтгандик. Фильмни тугатиб олиб бориб, қўйиб берганимизда, улар кўриб, “янгилик бўлибди”, деб фикр билдиришди. Уларга айнан қайси жиҳати билан ёққанини сўраганимизда, улар умуман, ўзбекча фильмларга ўхшамабди. Чет эл фильмларига ўхшаган, дунё миқёсига мос фильм олибсизлар, деб фикр билдиришди.
- Кино суратга олишда қандай қийинчиликлар бўлди?
- Тўғри, ҳар бир фильмни суратга олишда ўзига хос қийинчиликлар бўлади. Лекин, биз қийинчиликларга тайёр эдик! Тайёр бўлганлигимиз туфайли, қийинчиликларни биргаликда енгишга ҳаракат қилдик.
- Фильмдаги қаҳрамонларингизни томошабинларга айтар сўзи борми?
- Биринчи навбатда, ғурур! Йигит киши ғурурли бўлиши керак! Бугунги кунда кўпайган баъзи қўшиқларга ҳайрон қоласан, “хиёнатингни юз марта кўриб кечирдим”... Эшитиб афсусланасан. Халқ куйланаётган қўшиқларга амал қилади, назаримда. Йигит киши хиёнатни кечириши кераклигига ишорами бу? Биз эса, қўшиқларимизда ҳар доим йигит кишининг ғурурини сақлашга ҳаракат қиламиз! Йигит киши севиб, абгор бўлгандир, йиғлагандир, аммо ғурури қўлида! Хиёнатни кечириб, ғурурини синдираётгани йўқ. Фильмдаги қаҳрамонларимиз шунчалик ғурурлики, ғурур учун, ўз севган инсонидан узоқлашишга ҳам тайёр! Ҳаттоки, ғурури туфайли, кимдир ёрдам беришидан ҳам бош тортади. Лекин, фильмдаги икки йигит ҳам, бир-биридан жуда фарқ қилади.
- Келажакда яна фильм суратга олишда давом этасизларми?
- Тўғрисини айтсак, бу соҳа бизни жуда ҳам қизиқтирди, ёқиб қолди. Шундай ният яна бор. “Юрак йиғлар” нинг давомини олиш ниятимиз бор!
- Негадир бугунги кунда ижодингизда “Сўрама” қўшиғингизга ўхшаган хитлар ёзилмаётгандек. Бунга сабаб, фильм суратга олишга берилиб кетганингиздан эмасми?
- Сабаб шу! Шу фурсатдан фойдаланиб, барча мухлислардан узр сўраймиз. Сабаби, кино билан бўлиб, уларга вақт ажрата олмадик, янги қўшиқлар тақдим қила олмадик. Қанақадир ўзимизни ижодимизда ҳам сусайиш бўлди. Мана 6 ой давомида янги қўшиқлар чиқармадик. Фақат кино билан банд бўлдик. Чунки, кечаси ҳам съёмкаларимиз бор эди. Шу сабаб ҳеч вақт ажрата олмадик. Ҳатто, ҳамкорликдаги юлдузларимиздан Шахзода, Лолаларга ҳам кечиктириб қўшиқлар ёздик. Чунки, шартнома бор. Уларга қўшиқ ёзиб бериш керак. Лекин, кечикишни тўғри тушунишди. Ўзи бошида биз 10 тача янги қўшиқ ёзиб, кейин кино бошлашимиз керак эди. Биз кинони бошлаганимизда, админстраторимиз у қўшиқларни бериб юриши керак эди. Шунда билинмасди. Лекин, биз бу нарсага улгурмадик. Ўзи ҳаммаси бирданига бўлиб қолди. Ҳаво ҳам, кескин ўзгариб қолди, натижада, майли, деб кинони бошлаб юбордик.
- Машҳурлик, сизларни қанчалик ўзгартира олди?
- Биласизми, машҳурлик бизларни қандай ўзгартирди? Олдинлари биз ўзимизга унча аҳамият бермасдик. Қандай маънода? Масалан, инсонлар билан бўладиган муомалада, мулоқотда сўзларимизга унчалик аҳамият бермасдик. Юриш-туришимизга ҳам, унча аҳамият бермасдик.
Сарвар: - Лекин, менга кўпчилик хонанда бўлишимдан олдин ҳам, “сен кўпчиликни менсимайсан” дейишарди. Ўзи шунақа характерим бор эди. Машҳурликдан кейин бу нарсага кучлироқ аҳамият бериб, ҳамма билан чиройли, яхши муаомлада бўлишга, ҳурмат қилишга ҳаракат қила бошладим. Чунки, “бу юлдуз бўлиб кетибди, ҳеч кимни менсимаяпти” дейишларини ҳоҳламайман! Шу сабабли, у ҳоҳ мухлис бўладими, ёки бошқа касб эгасими, ҳаммага чиройли ҳурматда бўлишга ҳаракат қиламиз.
- “Беном” гуруҳини концерт бериш нияти борми?
- Албатта, мана ҳозир ноябрда концерт бермоқчимиз. Бизни концерт чўзилганининг сабаби, биз жонли ижрода концерт бермоқчимиз! Албатта, 100 фоизли жонли ижро бўлади. Шунга шошмасдан тайёргарлик кўрмоқдамиз. Кейин, ўша “Тарона рекорс” студияси томонидан жонли ижрога жавоб берадиган техникаларни ҳам кутмоқдамиз. Тайёргарликлар бошланган, ноябр ойида 2 кун белгиланган кунлари ҳам аниқ, фақат куни ҳали сир. Кунлари санасини тез кунларда эълон қиламиз! Кейин яна бир насани айтиб ўтмоқчимиз, масалан, миллий қўшиқларда, эстрададаги темплар бўлмайди. У ерда бир хил кетади. Бошқача овозлар бўлмайди, ҳеч нима босиб қўймайди. Миллийликда йўналиш шунақаки, ижро этиш осонроқ, назаримизда. Бизнинг йўналишимизда эса, биз ярим овозда, қанақадир ширин ижро этишга ҳаракат қиламиз. Бизнинг мусиқада овозлар кўплиги учун, яъни товушлар кўплиги учун ҳам қийинроқ. Бизда сентез товушлар кўп бўлгани учун, жонли айтганда овозни йўқ қилиб қўяди. Шу сабаб, бизни овозимизга мос овоз берадиган техника керак. Ўшани кутмоқдамиз. Лекин, тайёргарлик катта, бошлаб юборганмиз.
- Биринчи концерт дастурингизда жонли ижродан ташқари, яна қанақа янгиликлар билан бойитилиши кутилмоқда?
- Ҳозирда уни олдиндан айта олмаймиз. Лекин, жуда катта фишкалар бўлиши режалаштирилмоқда. Концертлар борасида ҳам янгилик бўлади.
- Кечаги ва бугунги ўзбек санъати ҳақида фикрингиз?
- Кечаги ўзбек санъати ҳам ёмон эмасди. Масалан, қўшиқлар жуда маъноли эди. Рақобат кам бўлганлиги сабабли, қўшиқлар маъноли ва оддийлиги деймизми, қанақадир бўрттирилмаган ҳолатда берса, хит бўлиб кетарди. Чунки рақобат кам эди, эшиттирилиш имконияти кўп эди. Чунки, санъаткор кам бўлса, қўшиқ шунча кўп тарқалади. Ҳозирги замонда бўлса, жуда ҳам ривожланиб кетди. Санъаткорлар ҳам кўп. Буни қайсидир маънода ривожланиш, деб айтиш мумкин, лекин яна қайсидир маънода орқага кетиш ҳам дейиш мумкин, назаримизда. Орқага кетиш сабаби, ҳар хил профессионал, нопрофесионал, ҳаваскор гуруҳлар, кўпайгани сабабли, халқнинг кўнгли қўшиқдан қолаётгандек... Негаки, бу ҳам навбатдаги оддий қўшиқ, ёки хонанда дейишади. Биз мана чиқдик, лекин бизлардан кейинги гуруҳ ва хонандаларга чиқиб олиш, яъни танилиб олиш жуда ҳам қийин бўлади.
- Нима учун?
- Сабаби ҳар хил профессионал нопрофессионаллар кўпайгани учун, халқда ишончсизлик пайдо бўлган. Мисол, янги қўшиқ премьера бўлмоқда, деса қизиқмай қоладилар. Чунки, ўша навбатдаги саёз қўшиқ бўлиши мумкин, деб эшитмай ҳам қўяди. Лекин, реклама, ёки талантнинг кучи билан чиқиб олса бўлади, деб ўйлаймиз.
- Сизларга мухлисларингиз фикри қанчалик муҳим?
- Бизларга мухлисларимиз фикри, сув ва ҳаводек муҳим. Сабаби, мухлислар борки, хонанда ёки гуруҳ яшайди. Санъатда бор бўлиб юради! Шунинг учун, ҳар битта мухлисни, яхшими ёмонми, фикрини яшашга ҳаққи бор, деб ўйлаймиз. Шу сабаб ҳар биттасини инобатга олишга ҳаракат қиламиз. Интернет тармоқларидаги ҳар битта келаётган хатларни кўздан кечирамиз. Агарда ўзимизнинг вақтимиз бўлмаса, пресс- котибимиз кўздан кечириб, бизларга етказади.
- Ҳақиқий муҳаббат ҳаётда бир маротаба келади, деган иборага муносабатингиз?
- Ҳақиқий муҳаббат инсонга ҳақиқий муҳаббатни қадрига ета олса, қанчалик шу муҳаббатга эҳтиёж сезса, шунчалик ҳақиқийлигини хис қилиб бораверади. Лекин, шундай инсонлар бор. Ҳақиқий муҳаббат келганда ҳам, унга ўйинчоқ сифатида қарайди. Худди шундай образни мана “Юрак йиғлар” фильмида кўришингиз мумкин. Ҳаётида ҳақиқий муҳаббат дуч келади, лекин у ўзига ўзи ишонмайди. “Наҳотки мен севиб қолдим, севиб қолиш менга ожизлик, бунақа нарса бўлиши мумкин эмас” дейди. Лекин, охирида у бола барибир хатосини тан олишга мажбур бўлади, албатта тақдир тарафдан! Демак, ҳақиқий муҳаббат бор!
- Қўшиқ яратганда биринчи нимага аҳамият берасизлар?
- Қўшиқ яратганда, биринчи навбатда созларига аҳамият берамиз, у қанчалик одамга ёқимли, қанчалик эсда қолиши ва одамларни ўйлата олади? Биринчи ўринда, албатта мусиқа охангларига ҳам аҳамият берамиз. Янги саундлар яратишга ҳаракат қиламиз. Бунинг учун бизларда етарли техникалар бор. Шу сабабли ҳам, биринчи ўринда саунд, иккинчи ўринда мусиқани ёқимлилигига, учинчи ўринда шеър.
- Ижодингизда бир хиллик юзага келиб қолмаслиги учун, кўпроқ нималарга аҳамият берасизлар?
- Бизлар ижодимизда бир хиллик чиқмаслиги учун кўп нарсага аҳамият берамиз. Ўша бир хил йўналишдаги қўшиқдан, 2 ёки 3 марта фойдаланамиз. Кейин бошқа йўналишга ўтамиз. Лекин, бу ёқда мухлислар талаблари ҳам бор. Мисол учун, “Дард” қўшиғига ўхшаган қўшиқ сўрашса, чиқарамиз. “Сенсиз” деган қўшиғимизни чиқарганмиз, у ҳам жуда ҳам хит бўлди, оммабоп бўлди. Мана ҳозирда “Сўрамага” ўхшаган қўшиқ чиқаринг, деган талаблар бор. Худди шундай қўшиқ чиқаришга мажбур бўламиз.
- Ўз қўшиқларингизни тинглаганда ўзингиз нимани ҳис қиласизлар?
Сарвар: - Менга ҳамма қўшиқларимни яхши кўриб эшитиш, бу табий ҳолат. Чунки, ўзингиз яратгансиз, ўзингизнинг маҳсулот ёқиши табий. Лекин, шуларнинг ичида “Ёғади ёмғир” деган тарона бор, “Юрак йиғлар” фильми учун ёзилди. Жуда ҳам ёқди, ёлғон бўлмаса, кунига бир 80 мартадан эшитяпман. Бунақаси биринчи марта бўлмоқда, ўзим ёзган қўшиққа ўзим касал бўлиб эшитишим!
Комил: – Менда ҳам худди шундай ҳолат!
- Ўзингизга четдан назар солиб, ҳеч танқид қила оласизларми?
- Албатта. Ҳар куни бир-биримизни танқид қиламиз. Ҳаттоки, уришиб турамиз. Бир-биримизни танқид қиламиз. Танқидни ижобий қабул қиламиз.
- Ҳеч бир-бирингиз билан узоқ муддатга аразлашиб қолганмисизлар?
- Узоқ муддатга аразлашмаганмиз, лекин муштлашган ҳолатларимиз бўлган. (кулади)
- Нега?
- Ижодни деб! (кулади) Масалан, бир гал Баҳрул бизни зўрға ажратди. Янги қўшиқни деб, уришиб кетдик. Комил кўчада сайр қилишни, клубларга боришни ёқтиради, мен бўлса янги ижод устида ишлайлик дейман, масъулиятни озгина бўлса ҳам сезаман. Комил бундай юришларни бас қил, озгина рейтингни тиклаб олайлик, 6 ойдан бери ижодда йўқмиз, кейин яна сайр қилиб юраверасан, олдин бу ишларни қилайлик, десам, “эй, менга нима, мен ўзимга ўзим хўжайинман” деди. Хуллас, шу билан бошланди. (кулади) Ҳозирда ҳаммаси жойида. Ўшанда муштлашганимизда ҳам, 1 соатдан кейин яна ярашиб кетганмиз.
- Ўзингиз тан олиб айта оладиган камчилигингиз?
Сарвар: - Мени энг тан олиб айтадиган камчилигим, ҳеч қаерда айтмаганман, сизларга айтаман. Ҳозирда озиш билан жуда ҳам кўп шуғулланмоқдаман! Кино учун 15 кг га оздим. Бу жуда ҳам қийин кечди. 103 кгдан 89 кг гача оздим. Кейин яна оғирлигим ортди. Ўша кинонинг охирги кадри суратга олиниб бўлиши билан, режиссёр “бўлди, олинди” дейиши билан бориб, кечки овқатни тановул қилдим ва ўшандан бери одатдагидек овқатланиб, қарабсизки, яна 10 кг га семирдим! Ўзи мени организмим шундай экан. Бир озиб, қайта семирса 2 баробарига семираркан. Мени энг биринчи камчилигим шу! Чекишми, ёки уйқуми, ҳар қандай нарсага иродам жуда кучли. Лекин, шу озишга келганда иродам сал етишмай қолмоқда. Комилнинг ҳам камчилигини мен айтаман, унда масъулият йўқ. Бир иш қилиш керак бўлса, ўша ишга енгил қарайди.
- Ўзингизни ҳаётингиздан келиб чиқиб, куйлаган қўшиғингиз ҳам борми?
- Ўзимизнинг ҳаётимиздан келиб чиқиб куйланган қўшиғимиз бор. Лекин, қайсилигини айта олмаймиз. Чунки, ҳаётимизда нима бўлганини билиб қолишади. (кулади) Иккаламизда ҳам, 2 та қўшиқ бор, иккаламизнинг ҳаётимиздан айтилган.
- Ҳаётда ўзингизни ўрнингизни топишда кимнинг ўрни катта бўлган, деб айта оласизлар?
Сарвар: – Мени ҳаётда ўз ўрнимни топишимда раҳматли онам сабабчи бўлганлар. Уларнинг ўринлари жуда ҳам катта, энди раҳматли бўлиб кетганлар. Хонандаликка қизиқишим 6 ёшлигимдан бўлган. Уйдагилардан менга сентизатор олиб беришларини сўраганман. Онам менга туғилган кунимга совға қилганлар. Кейин биринчи синфга чиққанимда, адамлар катта роял совға қилганлар. Мен хонанда бўламан, деганимда онам устимдан кулганлар “сени овозинг йўқ, қандай қилиб хонанда бўласан” деганлар. Ҳақиқатдан ўша пайтда овозим йўқ эди. Битта нотани 20 секундга ҳам чўза олмасдим. Онамларнинг ўзларини мусиқадан хабарлари бўлмаса ҳам, мен учун сал бўлса ҳам ўрганиб, менга гапириб ўргатардилар. Уларнинг гаплари менга таъсир қилиб, жаҳлларим чиқиб ўрганман. Шундай шуғулланганманки, ҳатто ёшлигимдан опера ҳам куйлаб танловларда ғолиб бўлганман. Айтганча, яқинда янги опера қўшиғимиз ҳам чиқади!
Комил: – Менда ҳам онам ва акаларим жуда катта сабабчи инсонлардан бўлишган.
Сарвар: - Яна бир инсон бор, иккаламизда ҳам ўз ўрнимизни топишга ёрдам берган бу инсон бастакор Убайдулла Каримов. Биз Тошкентга энди келган вақтимизда маблағ томонлама ҳам, бошқа томонлама ҳам катта ёрдам қилган устозимиз Убайдулла Каримов бўладилар. Жуда ҳам яхши инсон! Собиқ “Сетора” гуруҳининг хитларини ёзиб берганлар.
- Бугунги кунда продюсерингиз борми?
- Проюсеримиз бор, бу “Тарона” компанияси. Уларга ўз миннатдорчилигимизни билдирамиз.
- Ўзингиз бугунги ижодингиздан қониқасизларми?
Сарвар: - Бугунги ижодимиздан жуда қониқмаймиз, шу сабаб ўзаро муштлашишлар бўлмоқда. Шунақа даражада вақтнинг баракаси кетган, ёки қадри кетганми, тушунмаймиз. Бир кун шунақа тез ўтадики! Ҳеч нарсага улгура олмаяпмиз. Олдин, мисол учун, битта қўшиқни 3 кунда ёзиб премьера қилардик. Ҳозир ўша қўшиқни 1 ойда ёзиб, 1 ойда зўрға премьера қилмоқдамиз. Ҳозирги кунда, 4 ёки 5 соат ухлаймиз. Биласизми, Комил билан уришишимизга сабаб нима? Инстаграм, фейсбук, твиттер, яна бир нарсалар, интернет маълумот кўриш, бошқа инсонлар телефонига қул бўлиб қолганлар. Ишонасизми, мен ҳозир телефонимни ўзим билан олиб юрмайман. Мен ҳам қул бўлиб қолдим. Охири телефонимни олиб отиб юбордим. Ким қилса ҳам, телефонга жавоб бермайман. Кимни кўрсам айтаман: хафа бўлманглар, деб. Интернетга фақат ухлашдан олдин кираман, кўриб чиқиб, шу билан ухлаб қоламан. Ўша бўлмаса ухлай олмайман. Барибир интернетга озгина бўлса ҳам қуллик бор. (кулади).
- Ижодкорларга хос бўлмаган қайси характерингиз сизларни қийнайди?
- Унақа характер йўқ. Қайтанга ўша халақит берадиган характерни ҳам инсонга фойдаси бўлади. Масалан, уришамиз. Балки, бу ижодкорга хос бўлмаган керакмас характердир? Аммо, ижод борасида баҳслашиб, уришиш, ижодкорга керакдир? Натижаси зўр бўлади, охири ўша қўшиқ иккимизга ҳам ёқади.
- Ҳаётингизда кутилган севги келганми?
Сарвар: - Кутилган севгидан ҳам ортиқлари келган. Шундай пайтлар ҳам бўлган! Севгисиз инсон, инсон эмас! Инсонни инсон сифатида шакллантирадиган, инсонийлик туйғуларини сақлайдиган туйғулардан бири муҳаббат! Муҳаббат борки, инсон яшайди! Нимадир қилишга интилади! Муҳаббат жуда ҳам катта куч! Ҳақиқий муҳаббатнинг ҳаётдаги кучи жуда ҳам катта! Эркак киши ўзи севган инсонини, яъни аёлини хурсанд қиламан, ҳайратга соламан, деб жуда катта ишларни амалга ошириб юбора олиши мумкин! Ҳамма буюк ишларни ҳам амалга ошишига аёл, аёлга бўлган муҳаббат сабабчи! Инсон ҳамма нарсани ўзи учун эмас, аёлининг бахти учун, муҳаббатининг бахти учун қилади!
Комил: - Сарварнинг фикрларига қўшиламан! Кутилган севгига келсак, ҳамманинг ҳам ҳаётида муҳаббат бўлади, албатта.
Саида Вахобова
Феруза Фаттохова
