FATTOHHON.COM
« Все новости 
5 ноябрдан 8 ноябргача “Истиқлол” санъат саройида “Ниҳол” ва “Эътироф” мукофотлари совриндори Улуғбек Раҳматуллаевнинг “Ёшлик қайтмайди!” деб номланган яккахон концерт дастури бўлиб ўтди.
4 кун давомида бўлиб ўтган концертнинг ҳар бир кунида, кўплаб шоу бизнес вакиллари, Улуғбек Раҳматуллаевнинг ҳамкасблари уни самимий табриклашди! Жумладан, концертнинг илк кунида Ўзбекистон ва Қорақалпоғистон Халқ артисти Озодбек Назарбеков,
Ўзбекистон Халқ артисти Гулсанам Мамазоитова ва бошқалар (МАЪЛУМОТГА ЎТИШ!) ва иккинчи куни (МАЪЛУМОТГА ЎТИШ!) эса,
Шахзода, Ўзбекистонда хизмат кўрсатган артист Абдурашид Йўлдошев, “Ниҳол” мукофоти совриндорлари Достон Убайдуллаев, Манзура, хонанда Шохруххон ва бошқа ижодкорлар концертда томошабин меҳмонлар бўлишди. Концертнинг 3 кунида режиссёр Рустам Саъдиев, тўртинчи кунида эса, Ўзбекистонда хизмат кўрсатган артистлар Райҳон, Сардор Раҳимхон, Абдулла Қурбонов, Ёдгор Носиров ва бошқалар меҳмон бўлишди.
Улуғбекнинг яқин дўстлари Абдурашид Йўлдошев ва Достон Убайдуллаев тўртинчи куни ҳам концертда, саҳна ортида бўлишди!
Сардор Раҳимхон эса, Улуғбекни алоҳида табриклаб, саҳна ортидаги хонада зарбоф тўн ҳам кийдирди!
Концертда албатта, биринчи навбатда декорация томошабинлар эътиборини тортди. Тўридаги катта экранда, булутлар акс этиб, оппоқ либосдаги гўёки қанотларини силкитаётган кабутарлар қиёфасидаги раққосалар пайдо бўлди. “Кабутарлар” қўшиғининг мусиқаси янграб,
тўридаги декорация зинасидан қўшиқни куйлаб тушиб келган Улуғбек Раҳматуллаевни томошабинлар олқишлар билан кутиб олишди!
Қўшиқдан сўнг, хонанда томошабинлар билан саломлашиб, уларга вақт топиб концертга келганликлари учун миннатдорчилик билдириб, “бахтингга шерикман” деб, келганликларидан бахтиёр эканлигини айтиб, таъзим қилди, ҳамда ҳаяжонланаётганлигини ва бу одатий ҳолат эканлигини ҳам билдириб ўтди.
Шунингдек, концертга бир неча кундан буён келаётган томошабинлар ҳам борлигини айтиб, уларни ҳаётда танимаслигини, лекин шунча кундан буён ҳам уларни залда кўраётганлигига, эътибор учун раҳматлар айтиб ўтди.
Концертнинг 1 блоки давомида “I love”, «Анҳор», “Қарада”, “Юрак”, “Вой-вой”, “Бемор” қўшиқлари янгради! «Анҳор», “Қарада”, “Вой-вой” қўшиқлари концертда илк бор премьера бўлди!
“I love” қўшиғига “Сабо” рақс ансамбли қизлари томонидан намойиш қилинган романтик рақс, томошабинларнинг олқишларига сазовор бўлди.
Рақс ниҳоясида, асосий планда рақс тушган раққосанинг унга гул тақдим этишига,
Улуғбек Раҳматуллаев, алоҳида муносабат билдириб, аслида гулни йигит киши қизга бериши кераклиги, лекин концерт режиссурасига кўра, ҳозир саҳнада тескариси бўлганлигини айтиб ўтди.
“Анҳор” қўшиғида катта экранда севимли ўзбек кинофильмларидан кадрлар бериб борилди.
“Қарада” қўшиғи эса миллий йўналишда бўлиб, унга ҳам, “Сабо” рақс ансамбли раққосалари томонидан миллий рақс ижро этилди.
“Юрак” қўшиғида экранда қўшиққа монанд катта юрак тасвири намоён бўлди.
“Бемор” қўшиғи эса, бир вақтнинг ўзида кетма-кет ўзбек ва рус тилларида тақдим этилди. Бу қўшиқни залда кўпчилик томошабинлар хонанда билан биргаликда куйлаб ўтиришди.
Иккинчи блок олдидан, катта экранда махсус видеоролик намойиш этилиб, унда Улуғбек Раҳматуллаевнинг дил сўзлари, монолог тарзида актёр Санжар Саъдуллаев овози билан мана шу видеороликда акс этди.
Сўнг, саҳнага чиқиб келган хонанда томошабинлар талабларига биноан, “Лайлойимсан” ва “Чақалоқлар” қўшиқларини жонли ижрода куйлаб берди ва
бу қўшиқларни томошабинлар ҳам у билан бирга куйлашди!
“Мени кечир” қўшиғини эса, бир томошабиннинг илтимосига биноан куйлаб, “ана шундан сўнг, рафиқангиз сизни албатта кечирадилар” деб ҳазиллашишни ҳам унутмади!
Иккинчи блокда “Табиб”, “Соғиниб”, “Қайтар дунё”, “Тошкентда ёмғир ёғар”, “Бинафша”, ҳамда Шахзода билан “Рашк” дуэти янгради!
Орада томошабинлардан гуллар ва совғалар, хонанданинг мухлислари томонидан чиздирилган суратлари қабул қилиб олинди. Хонанда гулларни қабул қилаётганда гул тақдим қилаётган томошабинларни қайси вилоятлардан ташриф буюрганликларини айтиб, миннатдорчилик билдирди!
Концерт кунлари гуллар қабул қилиб олингач, хонанданинг ёш бола мухлислари, унинг қўшиқларини ўзига куйлаб беришди. Айниқса, ёш болаларни “Омадим келмади”, “Соғиниб тонглар отгунча” қўшиқларини куйлаши, завқли чиқди! Хонанда келажакда, насиб қилса, албатта бу болажонларнинг энг бахтли кунида хизматда бўлиб, табриклашни ният қилди!
“Табиб”, “Бинафша” қўшиқлари илк бор концертда премьера бўлди!
“Тошкентда ёмғир ёғар” қўшиғида “Сабо” рақс ансамбли махсус ёмғирга мос кийимларда рақс тушишган бўлса, Улуғбек Раҳматуллаевнинг ўзи ҳам, соябон кўтариб,
уни қўшиқ охирида раққосалардан бирига тақдим қилди!
“Бинафша” қўшиғи сокин ва романтик қўшиқ бўлиб, унда катта экран бинафшаларга “бурканди”! Шунингдек, бу қўшиқдан олдин хонанда залда ўтирган устози Фаррух Бадалбоевни томошабинларга таништириб, “Ёрим ёнига борсам”, деб номланган илк қўшиғини шу инсон ёзиб берганини, устози унга ҳар 10 йилда битта қўшиқ қилиб беришини ва агар 100 йил умр кўрса, 10 та қўшиқ қилиб бериши мумкинлигини, самимий ҳазил аралаш айтиб ўтди! “Бинафша” қўшиғи муаллифи шу бастакор эканлигини таъкидлади.
Шахзода билан “Рашк” дуэтини куйлаш ҳам ўзига хос бўлиб, қўшиқдан сўнг, Улуғбек Раҳматуллаев қўшиқдан келиб чиқиб, Шахзодадан “Сиз рашкчимисиз?”деб сўради. Шахзода эса, бунга жавобан “Меъёрида” деб жавоб берди!
Кутилмаганда Улуғбек Раҳматуллаев Шахзодага “агар алоҳида санъаткорлар маҳалласи бўлганида, биз сизга қўшни бўла олмасдик! Чунки, “мени рафиқам негадир мени сиздан рашк қилади!” дегач, Шахзода ҳам, залда 4 кундан буён томошабин сифатида залда ўтирган хонанданинг рафиқасига жавобан, “Рашк қилманг, Улуғбек сизни жудаям қаттиқ севади!” деди.
Хонанда ҳам, ўз навбатида “рафиқамни қўрққанимдан эмас, ҳурмат қилганимдан яхши кўраман!” деб айтиб ўтди.
Сўнг, саҳнага бошловчи, “Миллион” жамоасидан Даврон Кабулов таклиф этилиб, аввалига санъаткорлар маҳалласида, кимлар билан нима учун “қўшни” бўлмаслигига алоҳида таъриф бергач,
сўнг томошабинлар билан концерт ҳомийси томонидан тақдим этилган совғаларни қўлга киритиш учун махсус танловлар ўтказди!
Ғолибга телевизор тақдим этилди, ғолиб бўлмаганлар ҳам, концерт ҳомийсидан совғали саватларни қўлга киритишди!
Даврон Кабулов Улуғбек Раҳматуллаевнинг мухлислари жуда ҳам кўплигини айтиб, бир мухлис экран орқали табрикламоқчилигини билдирди. Экранда эса, Улуғбек Раҳматуллаевнинг “I love you” қўшиғини куйлаган Ҳиндистонлик Раж Манохар намоён бўлди, ўз кўнглидаги сўзларни айтгач, у “I love you” қўшиғини ўз талқинида куйлаб ҳам берди!
Улуғбек Раҳматуллаев ҳам, бундан жуда хурсандлигини билдириб, “Шунча жойдан туриб, мени бахтли кунимда бирга бўлмоқчи бўлибди, энди Ҳиндистонга борсам кутиб оладиган одамим бор!” деб, айтиб ўтди. Даврон Кабулов ҳам, ўз навбатида бу фахрланишга арзийдиган ҳолат эканлигини билдирди.
Шундан сўнг, хонанда концертнинг учинчи блокини “Ёшлик қайтмайди!” қўшиғи билан бошлади.
Учинчи блокда, “Она”, “Қирмизи олма”, Зиёда билан “Жоним фақат мени сев” дуэти, “16-17 ёшимда”, “Жоним” қўшиқлари янгради.
“Она”, “Қирмизи олма”, Зиёда “Жоним фақат мени сев” дуэти концертда премьера бўлди!
“Она” қўшиғи таъсирлилиги билан томошабинлар эътирофига сазовор бўлди, қўшиқ вақти экранда унинг клипи ҳам намойиш қилинди! Бу қўшиқдан олдин хонанда залда ўтирган онажонларга алоҳида самимий миннатдорчилик сўзларини айтар экан, залда ўз онаси ҳам ўтирганлигини айтиб, билиб-билмай қилган хатолари учун тиз чўкиб, онасидан узр сўради
ва саҳнадан тушиб, гуллар тақдим қилди! Онасининг “кечирдим” деганини ҳам айтиб ўтди.
Қўшиқдан сўнг, хонанда Ўзбекистон ва Қорақалпоғистон Халқ артисти Озодбек Назарбеков билан суҳбатда бўлганида, “Улуғбек мени сенга ҳавасим келади” деганини, бунга жавобан, “нега бундай деяпсиз? Ҳозирги кунда кўп санъаткорларни сизга ҳаваси келяпти!” деб, жавоб берганини, шунда санъаткор унга жавобан, “Тўғри! Концерт берасан-ку, шунда яқинларинг, дўстларинг, қаридошларинг, жигарларинг, ҳамма келади. 50 кун концерт бер, мана шу ҳамма куннинг ҳаммасини, биргина бирор кун, бирорта концертимда бир соат ўтирган онамга алмашардим” деганини айтиб ўтди. “Дунёда энг бой инсон, онаси бор инсон бўлса керак” дея, хонанда концертни давом эттирди.
Хонанданинг ўз умр йўлдошига бағишланган “Қирмизи олма” қўшиғи ҳам, томошабинларнинг олқишларига сазовор бўлди! Бу ажойиб қўшиқ Фазлиддин Раҳмонов шеъри, Бахтиёр Собиров аранжеровкаси билан яратилган! Унда хонанда севишган инсонлар қалбидаги тўйгача ва тўйдан кейинги муҳаббат ҳақида куйлади.
Зиёда билан дуэт ҳақида хонанда,
Зиёда дуэтдаги кўплаб сўзларни турмуш ўртоғидан телефонда рухсат сўраб олиб, кейин куйлаганлигини самимий ҳазил билан айтиб ўтди.
Концерт “Жоним” қўшиғи билан якунланди.
Концерт якунида хонанда ўзи билан бирга меҳнат қилган барча ижодкорларга чин дилдан самимий миннатдорчилик билдирди.
Сўнг, томошабинларга “Келганингиз учун катта раҳмат! Мен билан ўтган вақтингизга ачинмасангиз, бахтлимиз! Бугун ҳамма янгиликларимиз сизлар учун бўлди! Хайр, демаймиз, кўришгунча! деймиз” деб, самимий миннатдорчилик сўзлари билан концертни якунлади.
Концертни хонанданинг ўзи олиб борди ва концерт давомида ажойиб ҳазиллар билан томошабинларнинг кайфиятини янада кўтарди.
Айниқса, “Лайлойимсан” қўшиғини томошабинлар кассага билет олгани келганида сўраб кетишганини айтиб туриб, “Сизлар ҳам қайси қўшиқ керак бўлса, нима керак бўлса кейинчалик кассага келганингизда айтиб кетаверишингиз мумкин, масалан, ўтирганингизда кофе ичгингиз келиши мумкин, балки орқа фондаги кимдир сизга ёқмас, балки бурж бўйича тўғри келмас, шуларни ҳам айтиб кетсангиз, ўшанга қараб жойлаштирамиз”, дея ҳазиллашгани олқишларга ҳам сабаб бўлди!
Концертнинг 1 ва 2 кунида сўз устаси ва актёр Шукурилло Исроилов ўз хиргойилари билан томошабинларни янада хушнуд этди.
Концерт 4 кун давомида, яхши кайфият ва самимий руҳда ўтди!
Концертдан ўзига хос анонс тарзидаги қисқача видеолар инстаграмда Fattohhoncom ва Saida_Vahobova_Fattohhoncom профилларида!
Саида Вахобова
Феруза Фаттохова
Фотолар учун фотограф Сардор Азимовга алоҳида миннатдорчилик билдирамиз
