FATTOHHON.COM

ТОҲИР УСМОНОВ: ҲАММА САВОЛЛАРГА ЖАВОБ ЁЗМОҚЧИ БЎЛДИМУ, ЛЕКИН... 21.07.2014 11:02

 

Интервью "Тасвир" газетасида чоп этилган.

 

 

Хонанда ўзи ҳақида: - 1988 йил 7 сентябрда Тошкент вилояти Қибрай туманида туғилганман. Ҳозирда Ўзбекистон Давлат Консерваториясининг эстрада факультетида овоз режиссёрлиги бўйича таҳсил олмоқдаман. Ижодга қизиқишим болаликдан бошланган. Уйдагиларимнинг айтишича, кичкиналигимда тилим чиққанидан бошлаб, телевизор қўйиб қўйишса, унда янграган қўшиқларни такрорлаб куйлар эканман. Кўпчилик инсонларда болаликда бошқа соҳаларга қизиқиш бўлади, аммо менда ундай бўлмаган. Эсимни танибманки, ўзимни фақат санъатда кўрганман. Уйдагиларим ҳам, бу қизиқишимни қўллаб-қувватлашган. 6 синфдалигимдаёқ тўйга чиққанман! 12 ёшда эдим, маҳаллий ҳофизлар бирга тўйга олиб чиқишган. Шу тарзда санъатга кириб келганман. Кейинчалик Ҳамза Ҳакимзода Ниёзий номидаги Республика мусиқа коллежининг мақом, яъни анъанавий хонандалик бўлимини тамомладим. Лекин, профессионал кириб келишим, 2012 йилда бўлиб, ўша вақтдан росмана ижод қилишни бошлаганман! Илк марта катта саҳнага “Бор экан” деб номланган қўшиқ билан чиққанман. 2012 йил эди. Лекин, бу биринчи қўшиғим эмасди. Биринчи қўшиғим “Қачон келасиз?” деб номланган, уни 2009-2010 йилларда куйлаганман. У вақтда йўналишим эстрада эмас, миллий эстрада эди. Устоз санъаткорларга қизиқиб, бошлаганман. Кейинчалик ўзимни эстрада йўналишида синаб кўрдим. Шукур, ёмон қабул қилишмаяпти, деб ўйлайман.

Санъатга кириб келишимга асосий сабабчи, бу онамлар Гулчеҳра ора. Ўзимда қизиқиш ва ҳоҳиш кучли бўлган, аммо қўлимдан етаклаб, афғон рубоби чалишни ўргатадиган тўгаракка етаклаб олиб борган, онамлар! Баъзиларга ўхшаб, “нима қиласан, бор ўқишингни ўқи, қизиқиш ўтиб кетади” демаганлар! Бунинг учун улардан жуда ҳам миннатдорман.

Оиламизда санъаткорлар йўқ, аммо санъатни ҳурмат қилишади, қадрлашади. Онам ўқитувчи, отам фермер эдилар. Оилада 4 фарзандмиз, катта ака Дилмурод, Ҳасан, Зуҳра, мен. Акаларим, опам, ҳаммаси оилали. Мен энг кенжасиман. Отамлар қаттиққўлроқ бўлганлар, лекин ота-онам ҳеч қачон қизиқишларимга бефарқ қарашмаган. Аммо, жуда бир эркалатиб ҳам ташлашмаган.

 

 

- Қайси қўшиғингизни ўзингиз “ташриф қоғоз”им дея оласиз?

- “Диги-диги” қўшиғимни!

 

- Бу қўшиғингиз ва унга суратга олинган клипни плагиат ҳам дейишди. Ростдан плагиатми?

- Йўқ, бу қўшиқ плагиат эмас! Мен буни исботлаб бера оламан! Лекин, клип тўғри,  Тарканнинг клипига ўхшашроқ. Клипмейкерларга клип суратга олдириш учун борганингизда биринчи бўлиб, “ўзингиз нима ҳоҳлаяпсиз?” деган саволни беришлари табиий. Лекин, мен аслида ундай бўлиши керак эмас, деб ўйлайман. Қўшиқни тинглаб кўриб, санъаткор қандай ижод қилса, худди шундай клипмейкерлар ҳам ижод қилишлари керак, деб ўйлайман. Лекин, яхши клипмейкерларимиз ҳам кўп. Хуллас, менга шундай саволлар кўп бўлганлиги учун, менга кўпгина клиплар кўрсатишганда, ўша Тарканнинг клипини кўрганман. Аввалги клипларимни ҳам суратга олиш жараёнида, ғоя масаласида қийинчиликлар кўп бўлган. Биринчи клипимни Нозим Толипов ўзлари ўйлаб, суратга олганлар. Кейингиларининг ғоясини эса, ўзим берганман. Ўша пайтларда “Нозанин” деган қўшиғимни кўп айлантира олмадим. Ўшанда мана шу “Диги-диги” қўшиғимни ёзиб тайёрлаб қўйгандим. Шунинг учун ҳам бу қўшиққа тезроқ клип суратга олиб .юоришгга тўғри келган. Шунинг учун ҳам тезлашиб кетган ва ўзим ўша Тарканнинг клипини кўрсатиб “ман шундай қилиб қилайлик” деганман. Инсон ўзига ёққан нарсасини қилиши керак-ку. Ўзим шунга рози бўлганман. Аммо, ўзимга ҳам жуда ёқиб кетадиган эмас. Қолаверса, буни тингловчилар ҳам тўғри қабул қилишди, деб ўйлайман.

 

- Ўзи қўшиқларингиз ичида, қайси бири плагиат? Тан олиб айта оласизми?

- (ўйлаб) Бор экан, тан олиш керак. Бунинг сабабини ҳам айтиб ўтмоқчиман. Санъатга кириб келаётган вақтларим, эндигина катта саҳнага қадам қўяётганимда, мен ҳеч кимни танимасдим. Ҳеч қайси клипмейкер билан ҳам таниш бўлмаганман. Кимлигини айтишни ҳоҳламасдим, аммо баъзи клипмейкерлар алдашган ҳам. Соат саккиздан, соат тўрт-бешгача кутган вақтларим бўлган. Клипимни суратга олиб беришмаган. Ўзим ҳам ҳеч ким билан таниш бўлмаганман, ўзимни ҳам ҳеч кимга ялингим келмаган. Ўшанда мажбур бўлганман, бир қўшиқни жуда яхши кўрардим, озарбайжон қўшиғимиди, адашмасам, “Бари бахт” деган. Уни устоз санъаткорлар ҳам ижро қилишган. Ўша қўшиқни янги аранжеровкада эшитиб қолганман, ўша қўшиқни Темур деган шоиримизга олиб бориб, сўз ёзиб беришини илтимос қилганман. Даврон Абдуллаевга мусиқасини басталаб, ҳам яхши кўрганимдан, ҳам мажбур бўлганимдан, ижро қилганман.

 

 

- Ҳозирги ижодимда нима етишмаяпти, деб ўйлайсиз?

- Ижодимда етишмаётган нарса йўқ, деб ўйлайман. Бу билан жуда зўр ижод қиляпман, деганим эмас! Чунки, ёшимизда, Ўзбекистонимизда қилинаётган шарт-шароитларда бир нарса етишмаяпти, дейиш нотўғри, деб биламан. Биз кўпроқ меҳнат қилишимиз, ижод қилиб, изланишимиз керак, деб ўйлайман. Ҳар қандай ишни албатта амалга ошириш мумкин. Нимадир етишмаяпти, дейиш бу ношукурлик бўлиб қолиши ҳам мумкин, деб ўйлайман.

- Кинода роль ижро этишга кўпчилик хонандалар қизиқишади. Сизда-чи?

- Мени ҳам бир неча марта кинода роль ижро қилишга таклиф қилишди. Мен ҳам кинода роль ижро қилишни ҳоҳлайман. Лекин, авваламбор ўйлайманки, ҳамма қўлидан келган ишни қилгани маъқул. Аммо, бу билан мен келажакда, кинода ўйнамайман, деганим эмас. Қачонки, кинода бирор ролда ўзимни кўра олсам, шу нарсага кучим етишига ишончим, кўзим етса, амин бўлсам, ўшанда роль ижро қилишим мумкин. Ҳозирча бу нарсага тайёр эмасман.

 

- Жонли ижрода куйлай оласизми?

- Албатта, қисқа қилиб айтганда, жонли ижродан муаммойим йўқ! Бемалол жонли ижрода куйлай оламан.

 

 

- Сизнинг-ча, ижодкорда бўлиши керак бўлган хислатлар?

- Ижодкор биринчи навбатда ҳаракатчан ва камтар бўлиши шарт, деб ўйлайман. Мен зўр ижод қиляпман, дейиш нотўғри нарса! Ҳаттоки, мен яхши ижод қиляпман, дейиш ҳам ўзини синдириб қўйиши мумкин. Нафақат санъаткор, балки ҳар қандай инсон назаримда камтар бўлиши керак, деб ўйлайман. “Камтарга камол” деб, бежиз айтишмаган. Бундан ташқари ижодкор, нафақат мусиқавий, балки дунёвий илмларни ҳам билиши керак. Чунки, санъаткор, ижодкор шундай инсонки, масалан, шифокорни ҳамма танимаслиги мумкин, бошқа касбдагиларни бошқалар танимаслиги мумкин, аммо санъаткор ҳамиша халқнинг кўз олдида ва уни ҳамма кўриб туради. Унга халқ эргашади! Шунинг учун ҳам, санъаткор, ижодкор шунга муносиб бўлиши керак!

 

- Ўзингизни қўшиқларингизни тинглаганингизда нимани ҳис қиласиз?

- Ҳар доим ўз қўшиқларимни тинглаганимда янада кўпроқ ижод қилишим, ҳаракат қилишим кераклигини ҳис қиламан! Ҳар бир қўшиғимни тингловчиларга тақдим қилганимдан кейин, яна ҳам ўз устимда ишлашим кераклигини сезаман, ҳис қиламан.

 

- Томошабин меъдасига тегмаслик учун, хонанда нималардан сақланиши керак?

- Томошабин бу халқ! Хонанда ҳам, халққа ўхшаган бўлиши керак, халққа яқин бўлиши керак. Оддий халқдан ўзини сал бўлса ҳам баландроқ тутиш, назаримда томошабиннинг меъдасига тегиши мумкин, назаримда. Қолаверса, бачканаликдан ҳам қочиш керак. Ҳазиомуз қўшиқлар куйлаш керак, аммо бачкана эмас!

 

 

- Интернетдан фойдаланмайдиган хонандалар жуда кам. Сиз-чи?

-  Интернетнинг барча туридан фойдаланаман! Фақат тўғри йўлда, мухлислар билан мулоқотда бўлиб туриш учун! Ҳамма ижтимоий тармоқларда профилларим бор, аммо кўпроқ инстаграмм орқали мулоқот қилиш маъқулроқ. Чунки, у ерда чат йўқ. Илгари, кўп санъаткорлар “Одноклассники” орқали мухлислар билан мулоқотда бўлишар эди. Бу сир эмас. Аммо, ўйлаб кўрсангиз, жуда ҳам кўп смс, саволлар келади. Ҳаммасига жавоб бериш, осон эмас. Бир куни, бир неча мухлисларимни жавоб қайтармаётганлигим учун хафа бўлиб ёзганларини ўқиб, бир кунимни ажратиб, ҳамма саволларга жавоб ёзмоқчи бўлдим. Ҳамма келган саволларга жавоб ёзиб чиқдим. Охири тунги соат 03.00 да, 50 тача смс қолганда, “майли, ҳаммасига ёзиб бўлдим-ку, буларга эртага ёзарман, ахир эрталаб ўқишга бориш керак” дедим. Шу билан эртаси куни ўқишдан кейин ўша қолганларга жавоб ёзиб қўяй десам, қарасам, худди жавоб ёзилмагандек, кеча қанча смс бўлса, ундан ҳам кўп смслар турибди! Демак, ҳаммасига жавоб ёзиш учун истасангиз ҳам вақт етмас экан. (самимий) Хонандаман, ижод қилишим керак, студия, овоз ёзиш, сьёмка, тадбирлар, тўй хизматлари бор. Бу ёқда талабаман, ўқишим керак. Бу ёқда ота-онам, уйдагиларга вақт ажратиш керак, ахир оила даврасида ҳам ўтиргим келади. Ижтимоий тармоқлар бўлса, вақтни кўпроқ олиб қўяди. Шунинг учун ҳам, ижтимоий тармоқларга кўп вақт кетказмаган маъқул, деб ўйлайман. Аммо, мухлислар билан ҳам мулоқот қилиб туриш керак, чунки мухлисларсиз, халқсиз, биз ҳеч ким эмасмиз! Лекин, бошқа тарафлама, яъни кўпроқ ижод қилиб, халқ, мухлислар учун меҳнат қилишимиз керак. Шунинг учун ҳам, ижтимоий тармоқларга кетадиган вақтимни ижодга сарфлаганим маъқулроқ, мухлислар учун янги қўшиқлар тайёрлашим керак, деб ўйлайман.

 

- Ўзингиз кимнинг ижодини кузатиб борасиз?

- Ҳамма ижодкорларни ҳурмат қиламан! Чунки, кўряпман, осон эмас! Умуман, санъат йўли осон эмас! Ҳамма касбнинг ўзига яраша қийинчиликлари бор. Мени ўзимни бир одатим бор, ижодкор танлагандан кўра, қўшиқ танлашни маъқулроқ, деб биламан. Қўшиқ яхши бўлса, ижодкори ким бўлишидан қатъий назар яхши кўриб, тинглайман.

 

- Сизнинг тасаввурингиздаги бахт?

- Биринчи навбатда, юртимиз тинчлиги! Ота-онамизнинг хотиржамлиги, соғлиги! Қолаверса, мана шундай обод ва озод юртда эркин яшаётганлигимиз, эркин ижод қилаётганлигимиз, биз ёшларга яратилаётган шароитлар, берилаётган имкониятлар, бу жуда катта бахт! Чунки, ҳеч бир юртда санъаткорлар бизнинг юртдаги каби қадрланмайди, назаримда.

 

- Севгининг ҳаётингиздаги ўрни?

- Инсонга ҳаётда севги-муҳаббат керак! Севмаган инсондан яхшилик кутиб бўлмаса керак. Севги-муҳаббат ҳар хил бўлиши мумкин. Масалан, Ватанга муҳаббат, ота-онага, яқинларингизга бўлган муҳаббат. Айниқса, санъаткорга бу нарса жуда ҳам керак ва ҳаётида ўрни катта.

 

 

- Ҳаётингизга кутилган муҳаббат кириб келганми?

- Ҳозирча йўқ. (самимий) Энди, мен аёлим шундай бўлишини истардимки, менинг ота-онамни мендан икки баробар кўпроқ ҳурмат қилса, эъзозласа! Шунда мени уни, бундан бир неча баробар кўпроқ қадрлайман. Бундан ташқари, “хўп бўлади” деган гапи кўпроқ бўлса, мени тушунса, оқила, ҳар тарафлама, яъни ҳам ўқимишли, ҳам иболи, ҳаёли, ҳамда пазанда бўлса. Қолаверса, мен жуда ҳам рашкчиман, буни ҳам тўғри тушунса.

 

- Касби қанчалик муҳим?

- Касби унчалик аҳамиятга эга эмас.. Масалан, менинг онамлар ўқитувчилар. Аёл кишининг ўз касби бўлади, масалан, тикувчи, ўқитувчи, шифокор, аёлларга хос касблар эгаси бўлса, ишлашига қаршилик қилмайман. Аммо, турмуш қурганимиздан сўнг, ишламай уйда ўтириши ҳам мумкин, негаки ҳаммага маълум хонанданинг деярли бўш вақти бўлмайди, бундай пайтда рафиқаси уйда бўлиб, болалар тарбиясига эътибор қаратиши керак бўлади. Энди, ҳаммасини вақт кўрсатади.

 

 - Мухлисингизга уйланишингиз мумкинми?

- Ҳа, мумкин. Энди бу пешона, тақдир.

 

 

- Бирор қарорга келишингиз қанчалик қийин ёки осон?

- Жуда ҳам таваккалчи эмасман! 30 фоиз таваккалчиман. Лекин, дуа ҳам узоқ вақт ўйламайман. Чунки, замон ўзи шиддатли. Замон тезлигидан қолиб кетмаган ҳолда, тез ўйлаб, қарор қабул қилиш керак.

 

- Устозларингизнинг қайси ўгитларига амал қиласиз?

- Ҳамма ўзимдан аввал чиққан санъаткорларни устозим, деб биламан. Ўзимдан катта инсонларнинг ҳамма ўгитларига амал қилишга ҳаракат қиламан. Ўзим кўп устозларда таълим олганман. Айнан қўшиқ борасида, мақом борасида Ўзбекистон Халқ ҳофизи Бекназар Дўстмуродовнинг шогирдиман. Вокал бўйича, Консерваторияда Эгамберди акадан таҳсил олдим. Ҳозирги ижодимда Бобур Умаровни ўзимнинг устозим, деб биламан. Ҳаётда эса, ота-онам, акам.

 

- Шоубизнесга кириб келишдан олдин қандай тасаввурда эднгизу, ҳозир-чи?

- Тасаввурларим ўзгармаган, десам ҳам бўлади. Чунки, шунинг ичида ўсдим. Доим қандайдир миқдорда хабардор бўлиб юрганман. Тўғри, ўзига яраша қийинчиликлари ҳам бор экан. Инсон, хонанда бўлиб, озгина кўзга тушгандан кейин кўп нарсадан тийилишига тўғри келади. Маданият, биринчи ўринда бўлиши керак, санъаткор аҳли, бировга ўрнак бўла оладиган даражада бўлиши керак, деб ўйлайман. Ўзим ҳам тўғриси, ёмон ўрнак бўлиб қолишдан қўрқаман. Мана шу тарафлари бироз қийинроқ.

 

- Қайси мусиқа созини чала оласиз?

- Торли созлардан ҳаммасини чала оламан. Танбур, рубоб, мактаб вақтимда 7 йил афғон рубобида ўқиганман.

 

- Пиарга муносабатингиз?

- Пиарга муносабатим яхши. Пиар ўзи нима? Пиар бу халқ нима ҳоҳлаётганлигини, ўзига кўрсатиб бериш, аслида. Аммо, назаримда кўпчилик пиарни бошқача тушунади. Масалан, профилларга, интернетларга кимлар биландир суратларини қўйиб ташлаш, деб тушунишади. Менимча, бу ҳақиқий пиар эмас. Пиар, аслида яхши маънода, халқнинг ҳоҳишидан келиб чиқилади, деб ўйлайман. Бундай пиарга, албатта яхши қарайман. Ҳар хил расмлару, видеолар чиқариб ташлаш, бу пиар эмас, бу яхши нарса эмас, деб ўйлайман. Масалан, менинг профилларимда ҳам унақа пиар бўладиган суратлар йўқ. Ҳамма қатори, оддий суратлар жойлаштираман. Баъзилар қизлар билан пиар қилишади, ахир бу ёлғон-ку, юқорида айтганим, отамнинг ўгитига амал қиламан, ёлғондан қочаман!

 

- Қўшиқ танлаганда биринчи шеър ёки мусиқа?

- Биринчи бўлиб, шеърга катта аҳамият бераман. Ҳозирги кунда кўпроқ Бобур Умаров кўпроқ қўшиқларимнинг шеъри муаллифи, олдинги қўшиқларимнинг шеър муаллифлари Темур, Ботир Эргашев, Умида Абдуазимова. Шеърни биринчи навбатда оддийлигига, оддий, халққа тушунарли ва тез етиб борадиган қилиб ёзилганлигига аҳамият бераман. Халққа яқинроқ бўлиши керак. Масалан, Муҳаммад Юсуфнинг шеърларини ўқисангиз, у ерда ҳеч қандай тушунмайдиган сўзларингиз кам. Лекин, инсоннинг юрак юрагига кириб кетадиган сўзлар. Мен ўзим ҳозир худди шундай ижод қиляпман, дея олмайман. Лекин, шунга ҳаракат қиляпман.  

 

- Санъат бугунги кунда сиз учун нима?

- Борлиғим! Ҳам касбим, ҳам ишим, ҳам ҳаётим. Санъат мен учун ҳамма нарса.

 

 - Энг биринчи танқидчиларингиз?

- Уйимдагилар, оила аъзоларим. Биринчи қўшиғимни танқид қилишгани эсимда. Чунки, биринчи танқид, доим эсда туради. Ўшанда “битта сўзни кўп қайтарибсан” дейишганди. Кўринишга ҳам танқид беришган. Улар мени ҳамма нарса бўйича танқид қилишади, чунки улар барибир яқинларим. Агар бировга қўшиғимни эшиттирсам, мана бу ери бундай экан, дея олмаслиги мумкин. Чунки, кўз кўзга тушади, менинг қандай инсон эканимни билмайди, шунинг учун ҳам, “қўшиғинг яхши чиқибди” деб юбориши мумкин. Ёки, масалан, бирор тингловчини олайлик, сизни кўриб қолса, кўриб қолганлиги учун ҳам, “қайси қўшиқни айтганди, ҳа мана бу қўшиқни айтганди” деб эслаб, ўша эслаган қўшиғини, “мана шу қўшиғингиз зўр чиққан-да”, дейиши мумкин. Аслида у сизнинг қўшиқларингизни кўп эшитмаган бўлиши ҳам мумкин. Танқидчилар ҳам, сизни ёдингизда қолиш учун, қайси қўшиғингизни яхши чиққанлигини айтиши мумкин. Аммо, асосий камчилигингизни айта оладиганлар бу яқинларингиз, деб ўйлайман.

 

- Ким билан дуэт куйлаган бўлардингиз?

- Бу ҳақида кўп ўйлаганим йўқ, ҳали. Аммо, дуэт куйлаганимда ижро имкониятлари ўзимдан баландроқ хонандалар билан дуэт куйлаган бўлардим. Устоз санъаткорлар билан дуэт куйлашни ҳоҳлардим. Чунки, биз уларни тинглаб катта бўлганмиз, улар олдида уялиб қолмаслик учун ҳам, масъулият кучлироқ бўлади.

 

- Санъат сизни нимага яқинлаштирдию, нимадан узоқлаштирди?

- Санъат мени халққа яқинроқ қилди. Эришаётганларимга эришиб келяпман, шукур. Аммо, ҳеч нарсадан узоқлаштиргани йўқ. Санъат орқали, менга масалан, янги одатлар қўшилди, хушмуомалалик. Аммо, сал одамовироқман, бу одатим ҳали ҳам бор. Санъат инсонни инсон сифатида янада ривожлантиради, деб ўйлайман.

 

- Машҳур хонанда бўлиш учун, инсонга нима керак, деб ўйлайсиз?

- Биринчи навбатда, ўша машҳурликка интилиш керак эмас, деб ўйлайман. Оллоҳ берган овоз бўлса, пешонага ёзилган бўлса, албатта ижодкор машҳур бўлади. Асосийси, кучли меҳнат қилиш керак, деб ўйлайман. Энг муҳими, омад керак. Кибрланиш керак эмас! Ҳозирги кунда айниқса, машҳур бўлиш қийин эмас, деб ўйлайман. Аммо, халқнинг кўнглидан жой олиш, севимли бўлиш, ҳақиқий инсон, ҳақиқий санъаткор бўла олиш, қийинроқ, назаримда.

 

- Яккахон концерт ҳақида ҳам ўйлаяпсизми?

- Яккахон концерт, бу мен учун катта имтиҳон!            Бу имтиҳонга қачон тайёрман, деб билсам, ўшанда концерт бераман.

 

- Тингловчилар фикри, сиз учун қанчалик муҳим?

- Энг муҳими, тингловчилар фикри! Мухлислар фикри, доим биринчи ўринда!

 

- Биринчи мусиқий альбомингиз тайёр бўлдими?

- Биласизми, мусиқий альбом, деганда кўпчилик, 15 та қўшиқ йиғилса, бўлди, мусиқий альбом тайёр бўлди, деб чиқариб юбориши мумкин, назаримда.  Масалан, менинг қўшиқларим 20 тадан ошса ҳам, мен кўпроқ сонга эмас, сифатга аҳамият бергим келяпти. Ўша мусиқий альбомимни тинглаётганда, масалан, “Диги-диги”ни эшитиб, кейин бошқа бир неча қўшиқни ўтказиб юбориб, яна биттасини тинглаб, яна ўтказиб юбориб, эшитмасин, дейман! Битта қўйганининг ўзида ҳамма қўшиқларни, бутун мусиқий альбомни эшитиб қўйганини билмасин! Тўғри, бу нарса қийин! Ҳаттоки, катта гапирилаётгандек туюлиши ҳам мумкин. Лекин, ҳаракат қилса, қийин бўлса ҳам, вақт кетса ҳам, амалга оширса бўлади, деб ўйлайман. Бу ҳам яхши ният, шундай мусиқий альбом чиқаришга ҳаракат қиляпман.

 

- Қайси клипингизни суратга олиш жараёнлари энг қийин кечган?

- “Бор экан” клипимники жуда ҳам қийин бўлган. Чунки, жуда ҳам совуқ эди. Созандаларим энг яқин, коллежда бирга ўқиган курсдошларим эди. Ҳаттоки, улар “хафа бўлсанг ҳам, бўлмасанг ҳам кетаман” дейдиган даражага келиб қолишган. Ўзимни қийналганимни-ку, гапирмаса ҳам бўлади. Суратга олиш ишларидан сўнг, анча вақтгача шамоллаб ётганман. Лекин, ўзи тўғриси, осонликча олинган клипимнинг ўзи йўқ. Ҳаммасида ўзига хос қийинчиликлари бўлган. Чунки, меҳнатсиз, қийинчиликсиз нарсанинг ўзи йўқ, назаримда. Ҳамма ишни яхшилаб, ўйлаб, меҳнат билан амалга оширасиз. Шунинг учун ҳам, ёмон қабул қилишмаяпти, назаримда.

 

 - Ота-онангизга энг манзур бўлган қўшиғингиз?

- “Қачон келасиз?” миллий эстрада йўналишида бўлгани учун бўлса керак. Лекин, биринчи қўшиғим улар учун жуда қувончли бўлган, мени фикрим, албатта.

Саида Вахобова