FATTOHHON.COM
« Все новости
Узоқ кутилган “Сенсиз ҳаёт зерикарли” фильми 30 августдан катта экранларда! Фильмда бош ролларни актёр, режиссёр, хонанда ва футболчи Алишер Узоқов, актриса Асал Шодиева, ҳамда актёр Беҳзод Муҳаммадкаримовлар ижро қилишган. Фильм режиссёри Муҳбилло Убайдуллаев.
Фильм ҳақида актриса Асал Шодиеванинг фикрлари билан қизиқдик.
- “Сенсиз ҳаёт зерикарли” фильмидаги ролингиз ҳақида қандай фикрдасиз?
- Мен бу фильмда идеал рафиқа, идеал аёл ролини ижро қилдим. У оиласи, эри, фарзандлари учун ҳамма нарсага тайёр! Унга жуда ҳам қийин эди. Чунки, унинг оиласида тушунмовчилик бўлади. Фильмда қаҳрамонлар жуда катта тушунмовчиликка тушиб қолишади. Бу тасаввур қилиб бўлмас даражада бўлади! Шундай вазиятда ҳам, улар бир-бирини тушуниб, ўша вазиятни енгиб кетишади! Эри ўзгариб қолганида ҳам, “бу мени эрим-ку, у бундай инсон эмас!” деб, оилани сақлаб қолишга ҳаракат қиладиган аёл! У бунга эриша олади ҳам. Чунки, инсон барибир инсонни ҳис қила олади. У ташқи кўринишидан нозик, навниҳол аёл, аммо унинг кучи мана шу ожизлиги, нозиклигида! У баъзида йиғлаши, нолиши мумкин, аёллик айёрликларини ишга солиши мумкин. Аммо, у барибир кучли ва ақлли аёл!
-Фильмнинг ўзи ҳақида умумий фикрингиз? Жараёнлар қандай кечди?
- Тўғрисини айтсам, “Сенсиз ҳаёт зерикарли” фильмини ўзим ҳам кутяпман! Чунки, у ерда кўп нарсалар очиқ кўрсатилмай, сўзсиз томошабинга етказишга ҳаракат қилинган. Инсон уни сезиши, ҳис қилиши мумкин. Бу оилавий мавзудаги фильм. Менимча, меҳр берилганлигини ҳар бир инсон сезади. Масалан, инсон ёмон ишлаган бўлса, бошқалар ҳеч нарсани сезишмайди. Лекин, “Сенсиз ҳаёт зерикарли”фильмида ҳамма чин дилдан ишлади. Чунки, чиндан ҳам шунга арзийдиган фильм. Унга, ўзимизни борлиғимизнинг бир қисмини, меҳримизни бериб ишладик. Бу сезилади, буни ҳис қилиш мумкин. Одатда, инсоннинг қандайдир ўзига яқин инсонлари бўлади. Баъзи фильмлар шундай инсонлар каби юрагингизга яқин бўлади. “Сенсиз ҳаёт зерикарли”фильми ҳам, томошабинлар юрагига шундай яқин фильм бўлса керак, деб ўйлайман.