FATTOHHON.COM
« Все новости 
25 август куни “Истиқлол” санъат саройида Ўзбекистон Республикаси Президентининг ёш истеъдодлар учун таъсис этилган “Ниҳол” мукофоти совриндорларини тантанали тақдирлаш маросими бўлиб ўтди! Мазкур тадбир Ўзбекистон Республикаси Маданият вазирлиги ва қатор ташкилотлар ҳамкорлигида ташкил этилди.
“Ниҳол” мукофоти мусиқа санъати йўналишларида ижод қилиб келаётган ёш истеъдод эгаларининг ижодини янада ривожлантириш, ҳамда уларни халқимизга танитиш, улардан келгусида иқтидорли санъаткорлар етишиб чиқишида муҳим ўрин тутади.
Бу галги “Ниҳол” мукофоти танловининг туман (шаҳар) саралаш босқичларида, 1006 нафар ёш иқтидор эгалари иштирок этиб, уларнинг энг муносибларидан 172 нафари Республика босқичида қатнашишга, ҳамда улардан 20 нафари “Ниҳол” мукофоти совриндори бўлишга муваффақ бўлишди.
Тадбир аввалида Ўзбекистон Республикаси Бош вазирининг ўринбосари, Республика Хотин-қизлар қўмитаси раиси Т.Норбоева сўзга чиқди.
Тадбирни бошланишида “Ниҳол” мукофоти совриндори Машҳурбек ва Ўзбекистонда хизмат кўрсатган артист Дилноза Исмияминова,
ҳамда иккинчи қисмидан Ўзбекистонда хизмат кўрсатган артист Самандар Ҳамроқулов ва “Ниҳол” мукофоти совриндори Мадина Мумтоз олиб боришди.
Тадбир давомида “Ниҳол” мукофоти мусиқа санъатининг бир неча йўналишлари бўйича топширилди.
Эстрада санъати йўналиши бўйича: Маржона Кабилова, Шахзод Нормуродов.
Мумтоз қўшиқ йўналиши бўйича: Саламат Аяпов, Мохларойим Бўтаева, Мафтуна Ахророва, Фаррух Бахранов, Диёрахон Мухтарова, Фаррух Саидов.
Мусиқа ижрочилиги йўналиши: Дилшод Каримов, Қаҳрамон Рашидов, Меҳринигор Абдурашидова, Сардор Ибрагимов, Беҳруз Нематов.
Опера ижрочилиги йўналиши бўйича: Акилбек Пиязов, Султонбек Абдурахимов, Йигитали Абланазаров, Аброр Рихситиллаев.
Рақс санъати йўналиши бўйича: Тигран Абдуллаев, Шерзод Кенжебаев, Дилором Мадрахимова.
Мукофотларни Ўзбек санъатининг ёрқин намоёндалари, таниқли санъаткорлар топширишди.
Жумладан, Ўзбекистон ва Қорақалпоғистон Халқ артисти, Маданият вазирининг биринчи ўринбосари Озодбек Назарбеков,
Ўзбекистон Халқ артисти Абдуҳошим Исмоилов (мукофотни топшириш учун саҳнага чиққанида, ёш истеъдоднинг ютуғидан қувониб, самимий хурсандчилик билан рақсга ҳам тушиб юборди),
Ўзбекистон Халқ артисти Гулсанам Мамазоитова,
Ўзбекистонда хизмат кўрсатган артист Райҳон Ғаниева,
Ўзбекистонда хизмат кўрсатган артист Махсет Утемуратов,
Ўзбекистонда хизмат кўрсатган артист Севара Назархон ва бошқалар...
Тадбир давомида санъаткорлар томонидан Ватанимиз, юртимиздаги фаровон ҳаёт ва бошқа мавзулардаги қўшиқлар янгради.
Бу йилги “Ниҳол” мукофоти совриндорлари катта имтиёзга эга бўлдилар. Ўзбекистон Республикаси Маданият вазирлиги ҳамда, Миллий телерадиокомпания ҳамкорлигида имзоланган Меморандумга асосан, “Ниҳол”нинг янги совриндорлари бир йил мобайнида, ўз қўшиқларини телерадиоканалларда бепул эфирга узатиш, аудиостудияларда имтиёзли мусиқа ёзиш имкониятига эга бўлишди.
Бу эса, ёш истеъдод эгаларини Халқимизга янада танилишлари ва ижодий ривожи учун муҳим қўллаб-қувватлаш бўлди!
“Ниҳол” мукофоти совриндорлари шунингдек, ўз йўналиши бўйича олий ўқув юртига имтиҳонсиз ва тест синовларисиз давлат гранти асосида ўқишга кириш имконияти, “Ниҳол” рамзи акс эттирилган соврин ва энг кам ойлик иш ҳақининг 70 баравари миқдоридаги пул мукофотига эга бўлдилар.
Ўзбекистонда хизмат кўрсатган артист Райҳон: - Ҳар бир инсоннинг ҳаётида қўллаб-қувватланиш, тан олиниш, муҳим аҳамиятга эга бўлиб, ўсиб келаётган ёш истеъдодларнинг ижоди янада ривожланиши учун, уларни қўллаб-қувватлашда, “Ниҳол” Давлат мукофотининг ўрни беқиёсдир! Бугунги мазкур мукофот эгаларига ижодий муваффақият тилайман, илҳом тарк этмасин, омад доимий ҳамроҳ бўлсин! Ҳозир “Ниҳол” мукофоти совриндорларига қараб, ўзимни ҳам, 2002 йилда мазкур мукофот соҳибаси бўлганимни эсладим... Ўшанда жуда ҳам ҳаяжонда эдим! Чунки, биринчи марта бундай мукофот эгаси бўлгандим, ҳамда ўшанда мени “Ниҳол” мукофотига муносиб кўришдими, демак, мен ижод йўлини тўғри танлабман, деган фикрга келганман ва нафақат мухлислар, тингловчилар олдида, балки мазкур мукофотга муносиб, деб билган Давлатимиз олдидаги юқори масьулиятни ҳис қилганман!
Мазкур мукофот юртимизнинг иқтидорли ёшларини янада ўз ижоди устида ишлаш, мақсадлар сари олға интилишга ундайди! Совриндорларга билдирилган юксак ишонч, келгусидаги улкан муваффақиятларга қанот бағишлайди. Келажакда, мазкур ёш ниҳоллардан, санъатимиз чинорлари етишиб чиқади, деган фикрдамиз. “Ниҳол” мукофоти, бу юртимизда ёшларга кўрсатилаётган улкан эътибор ва ғамхўрликнинг яққол намоён этилишидир!
Саида Вахобова
Феруза Фаттохова
Фотолар учун фотограф Достонбекка
миннатдорчилик билдирамиз
