FATTOHHON.COM
« Все новости
Бир донодан сўрадилар: -Шижоат нима? Доно жавоб берди: Шижоат юракнинг қуввати. Яна сўрадилар: Нега тананинг қуввати эмас? Доно шундай жавоб берди: -Агар юракда қувват бўлмаса, тананинг ҳам қуввати бўлмайди. Бу ҳикоят билан бошлашимнинг боиси бўлган саҳифамизнинг қахрамонида ҳам юрак қуввати мужассам. Юракдаги шижоати, сабр тоқати, тинимсиз ҳаракати билан эришган ютуқлари, бугун уни ота-онасининг ва яқинларининг фахрига айлантирди. Камила Тўхтаева, Халқаро тоифадаги спорт устаси, 123 карра Ўзбекистон чемпиони, Осиё чемпионати бронза медали совриндори, Баркамол авлод, Умид Нихоллари, Соғлом авлод учун мусобақалари ғолиби. Биринчи мусобақа ва биринчи ўрин.... -Мен бадиий гимнастика билан 6 ёшимдан буён шуғулланаман. Мени бу спорт турига кириб келишиимга бувижоним сабаб бўлганлар. Улар мени биринчи мураббийим Анаэлла Андреевна Малкинанинг ёнига олиб келганлар. Анаэлла Андреевна дастлабки машғулотларимдан то спорт устаси даражасига эришгунимга қадар мен билан шуғулланганлар. Тўғриси, бувим мени бу спорт турига қизиқтирганларида “саломатлигинг учун, қадди қоматинг чиройи бўлиши учун” деб қизиқтирган эдилар. Оиламизда спортчилар бўлмаган, лекин спортга қизиқиш, у билан мунтазам шуғулланиш ҳаммамиз учун кундалик ҳолат бўлган. Шундай қилиб мен бадиий гимнастика оламига кириб келдим ва астойдил машқларни бажаришни бошладим. Ниҳоят биринчи мусобақа ва биринчи ўрин. Бу жуда ёқимли эди. Албатта, мен яна бу ёқимли ҳаяжонни туйишни ҳоҳлардим ва биринчи ўринни ҳеч кимга бергим келмасди. Бунга эришдим ҳам. Бунинг учун эса тинимсиз ҳаракат қилдим. Бугунги фаолият...
-Бугунги кунда Фонд Форум қошидаги “Форум Юниор ” спорт мажмуасида бадиий гимнастика бўйича мураббийлик қилиб келмоқдаман. Шогирдларим жуда кўп. Бадиий гимнастикага бўлган қизиқиш кундан кунга ортиб бораётгани мени жуда қувонтиради. Бу ҳам бўлса юртимизда спортга бўлган эътиборнинг кучайиб бораётгани, бизнинг спортчиларимиз дунё ареналарини забт этаётганидан дарак беради. Мен ҳам ўз шогирдларим билан бир мақсад учун ҳаракат қилмоқдамиз. Бу ҳам бўлса, Ўзбекистонимиз байроғини юксакларга кўтариш. Шунингдек, Фонд Форумнинг «Снежинка» бадиий гимнастика бўйича клублараро биринчилиги, ҳамда Замонавий хореография ва спорт пластикаси халқаро танловларида ҳам ташкилотчи, ҳам мураббий, ҳам иштирокчи сифатида қатнашиб келмоқдаман. Менга бу ташкилотда ишлаш жуда ёқади. Чунки, бу лойиҳалардан иштирокчилар завқ олишади, тажриба алмашишади, дўстлар орттиришади. Бу мусобақаларда менинг ҳам ўқувчиларим ҳам иштирок этишиб, совринли ўринларни қўлга киритишмоқда.
Билганим ва ўрганганим....
Мураббийим ҳам каттиққўл, ҳам меҳрибон эдилар. Мен бугун нимагаки эришсам, улар туфайли, деб ўйлайман. Чунки улар мени ҳеч қачон ортга қайтмасликка, мақсад учун курашишга ўргатганлар. Улардан ўрганганларим ва билганларимни ўқувчиларимга ўргатаман. Худди улар сингари машқлар жараёнида ҳам қаттиққўл ҳам меҳрибон бўлишга ҳаракат қиламан. Қизлар менинг ҳар битта айтган сўзимга қулоқ солишади. Энг қийин машқларни ҳам астойдил бажаришга ҳаракат қилишади. Ҳар битта ўргатаётган машқимда ўзимнинг болалиги ёдимга тушади. Қийинчиликка чидолмай кўз ёш қилаётган қизларни кўрсам, баъзан йиғлаган кунларимни эслайман. Лекин, бу қийинчиликлар халқаро мусобакаларда қатнашиб, олий ўринларни эгаллаб, кўксингда шода шода медаллар ярқираб турганида, бутунлай ёдингдан чиқиб кетади.
Ҳам мураббий, ҳам талаба...
Ҳозирги кунда Тошкент Давлат Иқтисодиёт Институтининг халқаро туризм факультети 4 босқич талабасиман. Халкаро туризм ва спорт бир-бири билан боғлиқ ва мен учун муҳим бўлган йўналиш, деб ўйлайман. Чунки, спортчиларнинг аксарияти чет давлатларга чемпионатларга боришади. Ҳам ўқиб, ҳам мураббийлик қилиш қийин, албатта. Лекин, инсон қилаётган ишини севса, ундан завқ олса, бемалол ҳаммасига улгуриши мумкин. Мен ўз ишимни, ўқувчиларимни, уларнинг ота-оналарини, умуман бадиий гимнастикани яхши кўраман. Шу боис бўлса керак, ўзимда ҳеч қачон толиқиш, зерикиш сезмайман.
Матонат бу ҳар бир инсоннинг ўз фикрида ва мақсадида саботли бўлиши, ҳар бир ишга қўл урганида, уни охиригача етказиш учун маҳкам туриши ва барча ишда сабр қилишидир. Бадиий гимнастика ҳам кишидан ана шундай матонат ва сабр талаб қиладиган спорт турларидан биридир. Эндигина 21 ёшни қарши олган Камила, ёш бўлишига қарамай, бугун қанчадан қанча ота-оналарнинг ҳурматини қозонган мураббийлардан бири. Назарова Умида 
Умида Назарова:-Менинг қизим Афруза Йўлдошева 3 йилдан буён Камиланинг қўл остида гимнастика билан шуғулланади. Қизим 7 ёшда. У 3 йил мобайнида турли мусобақаларда иштирок этиб, 8 та олтин ва 7 та кумуш медалини қўлга киритди. Бу Камиланинг қилган меҳнати меваси деб ўйлайман. Мен қизимдан фахрланаман ва мана шу спорт турига олиб келганимдан жуда мамнунман. Камиладан эса мени ЧЕМПИОННИНГ ОНАСИ деган шарафга муяссар қилгани учун бир умр миннатдорман. Шу ўринда биз ота-оналар Фонд Форумга ва унинг асосчиси Гулнора Каримовага ҳам раҳмат айтмоқчимиз! Фарзандларимиз учун ташкил этилган бетакрор лойиҳалар, уларни янада спортга қизиқтириб, янада юқори марраларни забт этишга ундайди!
Чиннигуль Алтыбаева
-Қизим Ким Светланани 1 ярим йил илгари “Форум Юниор” спорт мажмуасига олиб келганман. Илгари ҳам 2 ярим йил бадиий гимнастика билан шугулланганмиз. Қизим чақалоқлигида кўп касал бўларди. Шу спорт турига келганидан бери мен унинг касал бўлганини билмайман. Ҳозир биз хаётимизни гимнастикасиз тасаввур кила олмаймиз. Бир ярим йил ичида, қизим 2 та олтин, битта бронза медалига совриндори бўлди. Албатта қийинчиликлар бўлди, лекин мен ҳам қизим ҳам, Камиланинг ҳар битта айтган сўзини қолдирмай бажаришга ҳаракат қилдик. Мен ота-оналарга шуни айтмоқчиманки, имкон қадар фарзандларингизни спортга жалб қилинг. Бунинг натижасини албатта кўрасиз.
Ким Светлана 7 ёш
Мен Камила опа сингари мураббий бўлишни хохлайман. Улар бизга мураккаб машқлар билан бирга чиройли юришни, хушмуомала бўлишни ўргатадилар. Бу йил 1 синфга бораман. Албатта, мактабда аъло баҳоларга ўқиш билан бирга бадиий гимнастикани ҳам қолдирмайман. Чунки, мен гимнастикани жуда ҳам яхши кўраман.
Камила бугун бадиий гимнастиканинг эртанги куни учун хизмат қилмоқда. Унинг тиришқоқлиги, куч ва матонати бугун аста-секин ўз шогирдларида номоён бўлиб, унинг орзулари орзуларга уланмоқда. Умид қиламизки, у парваришлаб ўстираётган ниҳоллар эртага кўкларга бўй чўзади. Ана ўшанда Ўзбекистон байроғи баланд ҳилпираб, мадҳиямиз янграганда, Камиланинг қувончига биз ҳам шерик бўлайлик.