FATTOHHON.COM
« Все новости 
“Истиқлол” санъат саройида, куни кеча 7 апрелдан 25 апрелга қадар, (рекламада 24 гача эди, талабларга биноан яна 1 кун қўшилди, аммо шунда ҳам охирги 2 кун ичида концертга кириш учун билет қидириб юрган томошабинлар кўп эди...) бўлиб ўтган, Ўзбекистон ва Қорақалпоғистон Халқ артисти Озодбек Назарбековнинг концерт кунлари ўз ниҳоясига етди.
Йилнинг энг кутиладиган ва узоқ давом этадиган бу концертига нафақат бутун Республика, ҳаттоки бошқа юртлардаги ҳамюртларимиз ҳам етиб келишга ҳаракат қилишлари сир эмас.
Санъаткор томонидан тўлиқ жонли ижрода 19 кун давомида бўлиб ўтган концерт дастури, унинг ўтган йилги жонли ижродаги рекордини янгилади!
Концерт режиссёри “Замин” студияси раҳбари Саъдулла Абдуллаев. РЕЖИССЁРНИНГ КОНЦЕРТ ҲАҚИДАГИ ФИКРЛАРИГА ЎТИШ!
Концертнинг 14 кунида, яна бошқа кунларида ҳам, Озодбек Назарбековнинг санъаткор, хонанда ҳамкасблари концерт меҳмони бўлишди!
1) МАЪЛУМОТГА ЎТИШ! 2) МАЪЛУМОТГА ЎТИШ!
Озодбек Назарбеков либослари устида дизайнер Дилдора Қосимова ишлади.
Жонли ижрода бўлганлиги учун ҳам, концертнинг ҳар бир куни ўзгача ўтганлиги сир эмас! КОНЦЕРТДАН ФОТОЛАҲЗАЛАРГА ЎТИШ!
Ҳар куни, қандайдир ўзгаришлар бўлди. Концерт репертуарида фақат янги қўшиқлар ўзгармади, аммо томошабинлар сўраган қўшиқлар дастурдан ташқари равишда ижро қилиб борилди.
Концертнинг 1 кунидан то 19 кунига қадар, ҳар куни кўтаринки руҳда ўтди, залда бирорта бўш ўриндиқ қолмади!
Ҳар бир шўх қўшиққа томошабинлар рақс тушишдан тўхташмади, деярли ҳар бир сокин қўшиқ ҳам эътибордан четда қолмади!
Залга кириб келишдан томошабинларни концертнинг ўзгача декорациясию, чироқлар эътиборини тортган бўлса,
яна бир ўзгача жиҳат, бу концерт олдидан сарой саҳнасига тутилган оқ парда бўлди! Жаҳон опера юлдузлари концерти каби саҳнага оқ парда тутилганди, концерт бошланишида санъаткорнинг парда ортидан жонли ижродаги Бобур ғазали билан куйланган “Тишинг дур” таронаси янгради, парда ортидан унинг сояси кўринди.
Сўнг, парда очилиб, олқишлар остида Озодбек Назарбековнинг ўзи намоён бўлди!
Шу тарзда концерт дастури бошланди.
Қўшиқдан сўнг, санъаткор саҳнада томошабинлар билан шу қадар самимий сўрашдики, “Ассалому алайкум, яхшимисизлар? Яхши келдингизми? Уйдагилар тинчми?” каби яқинлар билан сўрашганда эшитиладиган сўзларни, ҳол-аҳвол сўрашни эшитиб, томошабинларда худди яқин одамини кўргандек таассурот пайдо бўлди. Шунингдек, санъаткор концертнинг илк кунида бу кунларга шукур сўзларини айтишни ҳам унутмади.
“Сизлар учун, сизларнинг кўнглингизни олиш учун, кучимиз етганича ҳаракат қиламиз! Ҳамиша менинг ардоғимдасизлар! Хуш келибсизлар! Раҳмат!” деб, барчага миннатдорчилик билдиргач, концертни давом эттирди.
Концерт репертуаридан жой олган энг янги қўшиқлар томошабинларга тақдим қилинди. Жумладан, “Гулғунчасан”, “Лайли”, “Гулюз”, “Мени ул бевафо қотил, бу оқшом телбаю қилди” (Огаҳий ғазали), “Қорли-қорли”, “Жонинг соғ бўлсин”, “Девонаман”, “Оллоҳимга айтиб бер”, “Атиргул”, “Дўмбирам” (Сурхонча), “Қалдирғоч” қўшиқлари.
Махсус интернет орқали ўтказилган (санъаткорнинг веб-сайти, ҳамда ижтимоий тармоқлар орқали) сўровнома асосида энг кўп овоз тўплаган, ҳамда томошабинлар томонидан талаб қилинган қўшиқлар, жумладан, “Дилором”, “Кечир”, “Бағдодда нима гаплар?” (эртак шоу учун тайёрланган қўшиқ), “Оёғингни қучиб йиғлагим келди”, “Онам бор-ку”, “Дил бўлди”, “Кўнглимнинг кўчасида”, “Анжанчасига”.
Ваъдага кўра, янги “Буюклар бисотидан: Заҳириддин Муҳаммад Бобур” мусиқий альбомидан: “Тишинг дур”, “Шайдо қилибсен”, “Лола”.
Устоз санъаткор Муҳриддин Холиқов репертуаридан “Ёнимда қол”.
Дастурдан ташқари, залдаги мухлисларнинг талабларига кўра, бонус сифатида “Хафа бўламан”, “Ўн беш кун бўлди, сени кўрмаганимга”, “Мажнунтол”, “Жоним асир” (Хоразмча) қўшиқлари.
Концерт давомида санъаткор турли ҳазиллари билан томошабинлар кайфиятини янада кўтарди, ҳамда бошловчиликни ҳам ўзи амалга оширди!
Дастур давомида санъаткор жонли ижрода куйлаши учун, созандалар меҳнати алоҳида ўрин тутишини ҳам айтиб ўтди!
Концерт давомида пешона терини артар экан: - Пешона терим оқиб кўзимга тушди. Пешона тери ҳам шунчалик шўр бўладими? Ия, нима деяпсизлар, пешонаси шўр одамни шунча мухлиси бўладими?)))) Борингларга шукур!
Огаҳий ғазалидан сўнг: - Бу олқишлар мен учун эмас, Огаҳий учун! “Дилором” қўшиғидан сўнг: - Кассеталарда устозларнинг қўшиқларини тинглаганимизда, томошабинларнинг олқишларини эшитиб қоламиз, қўшиқнинг биринчи қаториданоқ олқиш бўларди... Қани битта шўхидан бўлсин!)))) Ҳаттоки, концертда бўладиган танаффус олдидан ҳам, ҳазил сўзлар билан томошабинларнинг кайфиятини янада кўтариб юборди: - Яқинда бир хонанданинг концертига тушгандим, 7-8 қўшиқни куйлаб бўлганди, орқа қаторда ўтирганлардан бири “вой, битта кийим билан бутун бошли концертни ўтказиб юборадими?” деб гапириб қолишди. Ҳозир қоидаси шунақа эканми? Шунга яна бир янги костюм тиктиргандим. Кийиб чиқиб кўрсатай бўлмаса))))))) Концерт давомида сўз устаси Аваз Охун ҳам ўз чиқиши билан иштирок этди. Уни саҳнага чақиришни Озодбек Назарбеков қойиллатди: - Аваз Охун деган қизиқчи чиқибди, эшитдингларми? Мендан ҳам яхши кулдирармиш))) Шундан сўнг, Санъаткор билан Аваз Охун ўртасида ўзига хос ҳазил диалог ҳам бўлиб ўтди. Аваз Охун:-Мен ҳам костюмларингиздан биттасини кийиб олдим. Озодбек Назарбеков: - Ахир бу эски-ку, ўтган йилги. Аваз Охун:- Лекин, бу костюмда сир бор! Озодбек Назарбеков: - Мен кийган вақтда сир бор эди, ҳозир кир бор... Аваз Охун:- Лекин, шу костюмни кийиб мени ҳам қўшиқ куйлагим келди! “Оёғингни қучиб ухлагим келди...”)))))) Озодбек Назарбеков: - Ухлагиммас, йиғлагим келди! Аваз Охун:- Сизни йиғлагингиз келди, мени ухлагим келди!)))) Озодбек Назарбеков: -Унда шу костюм билан расчёт!)))) Аваз Охун:- Ака состав шу қўшиққа жонли чалиб берсин! Озодбек Назарбеков: -Қайси нотадан? Аваз Охун:- Ия, нота ҳам борми?)))) Озодбек Назарбеков: -Ҳа, нота, парда, қават, дегандек...))) Аваз Охун:- 3 қават, 59 уй))) Юнусобод 15 квартал)))) Озодбек Назарбеков (составга): - Йигитлар адресни билиб олдинглар, кетдик...)))) Аваз Охун:- Ия... Ҳа, майли, шу қўшиққа овоз беринг! Озодбек Назарбеков: -Бу қўшиққа овоз бериб бўлинган! Майли, мен сизга энг катта бойлигимни бераман! Аваз Охун:- Қани, қаерда?, деб излашга тушади. Озодбек Назарбеков (томошабинларга ишора қилиб): - Мана, шулар томошабинлар, мухлисларим менинг энг катта бойлигим! Уларни сизга ишониб топшираман, зериктириб қўймайсиз, деб ўйлайман. Шундан сўнг, Аваз Охун чиндан ҳам ҳазиллар билан томошабинларни зериктирмади. “Оллоҳимга айтиб бер” ва “Қалдирғоч” қўшиқлари концертнинг 2 кунидан репертуарга киритилди. МАЪЛУМОТГА ЎТИШ!
давоми бор!
Саида Вахобова
Феруза Фаттохова
Фотолар учун фотограф Муҳаммадалига алоҳида миннатдорчилик билдирамиз
Концертдан видеолар Инстаграм тармоғидаги Saida_Vahobova_Fattohhoncom профилида, ҳамда Fattohhoncom профилида
