FATTOHHON.COM
« Все новости 
СOMEDY UZ концерти ўзига хос ташкиллаштирилган бўлиб, унда СOMEDY UZ даги дуэт ва триолар чиқишлари, ҳамда уларнинг машҳур эстрадамиз вакиллари билан ҳам алоҳида чиқишлари ўрин олган эди.
Биринчи бўлиб, концерт таништирувдан бошланди. Яъни, СOMEDY UZ да ҳаммаси қандай бошланган эди? Бу борада видеоролик ҳам намойиш қилинди!
Шундан сўнг, ёш хонандалар Сирож ва Расул куйлашди.
Кейин эса, болалардан иборат рақс гуруҳининг чиқиши бўлиб ўтди.
Дастур олиб боришни дастлаб Аброр амалга оширди.
Сўнг эса, асосий қисмни Арсен ва Дилшод олиб боришди!
Бундан сўнг, саҳнага чиққан СOMEDY UZ резидентлари, ўз гуруҳларига 2 та қизни қабул қилиш ёки қилмаслик борасида, жуда кулгили муҳокама ўтказишди! Ниҳоят, бир овоздан 2 та қиздан иборат, 13 дуэт резидентлари СOMEDY UZ га қабул қилиндилар!
Шундан кейин, “Ва бошқалар...” дуэтига навбат берилиб, улар Инсон хаёлидаги фикрлар юзасидан видеоролик намойиш қилишди! Ўта қизиқарли бу видеода, турли инсонларнинг фикрлари ҳазиломуз кўринишда акс этади. Бу ерда ҳаттоки, Миржалол Қосимовнинг фикригача бор...
Сўнг, саҳнага “Ҳасан ва Ҳусан” триоси, “Нобель” дуэти билан бирга чиқишди! 5 киши биргалашиб, ажойиб саҳна кўринишлари тақдим этишди. “Эски шаҳардаги ҳолатлар”, “Қизлар ва йигитларнинг учрашувга қандай тайёргарлик кўришлари”, “Машиналар турар жойидаги бензин ўғирлашга уриниш”, “Бутикдаги ҳолатлар”, “Тантиқ қизнинг кучуги”, “Туғруқхона деразалари тагидаги ҳолатлар”, “Футболда турли халқлар дарвозабонлари жонли деворни қандай ўрнатадилар?” ҳамда, “Хаёлпараст аскарлар сафда” номерларини албатта кўриш керак!
Миршакар Файзуллоевнинг чиқиши ҳам, ҳеч кимни бефарқ қолдирмади! Ўз исми билан боғлиқ ҳолатлардан тортиб, агар мабодо кўчада садақа сўрайдиганлар ўқитувчи бўлиб қолса, қандай бўлиши, футболдаги эринчоқлик, сериалларнинг такрорланиш муаммоси, унинг талқинида ўзгача янгради!
Шундан сўнг, саҳнага гитара билан чиққан Олим ака, таклифга кўра, Анвар Санаевнинг овозига ўхшатма қилиб, гитарада, бошқа хонандаларнинг қўшиқларини, Санаев усулида куйлади! Зал яна кулгидан “портлади”!
Ислом Али қизлар ва йигитлар ўртасидаги оммалашган одатлардан сўз юритди. Масалан, у туфайли томошабинлар “фақат қизга йигитига кечаси соат 3 да ухлавоссизми, деб смс ёзишидан”, “фақатгина болалар узоқдан келаётган қизга тикилиб қараб туриб, яқинлашгач эса, шевада "бўмапти” дейишлари ва шунга ўхшаш оммалашган одатлардан хабардор бўлдик!
Шундан сўнг, хонанда Нилуфар ва бастакор Элдор Қаюмов биргаликда “Тантанам мани” қўшиғини тақдим қилишди! Шу кунларда оммалашган бу қўшиқ томошабинларни янада қувонтириб юборди!
Кутилмаганда “Ҳасан ва Ҳусан” триоси саҳнага махсус телбалар кийимидаги бир инсонни олиб чиқишди ва у билан руҳий касалхонадаги ҳолатни кўрсатиб бериб, махсус кийимдаги инсонни Жаҳонгир Позилжонов, деб эълон қилишди!
Аммо, Жаҳонгир Позилжонов, бу чиндан ўзи эканлигига ҳаммани ишонтиришига тўғри келди! Уни ҳаттоки, тўйига бориб бермагани учун жазоламоқчи бўлган мухлис ҳам пайдо бўлди!
Жаҳонгир Позилжоновни ҳаттоки яқин дўсти Жавлон Шодмонов ҳам “танимади”! Унга ҳаттоки фонограммада қўшиқ куйлатиб, “фонограмма қироли” деб ҳам эълон қилишди! Чиқиш ниҳоясида эса, трио бу ҳолатлар ҳаммаси шунчаки ҳали эканлигини маълум қилишди! Уларга жавобан Жаҳонгир Позилжонов ҳам “Соғ бўлганимда, сизлар билан бирга устимдан кулиб ўтирармидим?” деб жавоб қайтарди!
Шундан сўнг, саҳнага Умид Ашуров таклиф этилиб, у 2 раққос билан бирга, ажойиб рақс номери тақдим қилишди!
“Қошмақом” дуэти, хонанда Манзура билан Бухородаги омадсиз концертдан кейинги ҳолатларни ҳазил кўрсатиб беришди! Улар Манзуранинг рақиби қўчқор экан, деган фикрга келишди. Бу қизиқарли ролни Манзура маромига етказиб ижро қилиб, актёрлик маҳоратини намойиш қилди!
Шундан сўнг, “13 дуэт”га навбат берилиб, улар саҳнада хонанда Сардор Раҳимхон билан бирга саҳна кўринишини намойиш қилишди.
Сардор Раҳимхонга ўқитувчилик жуда ярашди, у “13 дуэт” билан бирга ўтириб олиб, қўшиқларнинг номларини берилиб таҳлил қилишди, жонли ижро ва фонограмма уруши ҳам қолиб кетмади!
Сўнг, Сардор Раҳимхон қизларга “Бомбей” қўшиғидаги рақс ҳаракатларини такрорлатмоқчи бўлди, қизлар эплай олишмади. Лекин, қизлардан бири, оёқларини осмонга кўтариб қўлларида юриб берди ва шуни такрорлаб беришини сўради.
Сардор Раҳимхон буни қанчалик уддалаганини эса, ўша вақтда саҳнада кўриш керак эди! Тўғриси, Сардор Раҳимхондан ҳеч ким бунчалик импровизация ва актёрлик маҳоратини кутмаган эди! Супер чиқиш бўлди ўзиям! Концертнинг энг фишка номерларидан бири деб бемалол айтиш мумкин.
Олқишлар билан хонанда “Бомбей” қўшиғини ҳам ижро қилди! Ҳинд либосларидаги қизлардан иборат рақс гуруҳи, бу қўшиққа ажойиб рақс ҳам тақдим қилишди.
Навбат Жаббор ака ва хонанда Самандарга келди. Улар бирга спорт билан шуғулланиб, пирог пиширишди! Яъни, Самандар спорт билан қандай шуғулланишни ўргатса, Жаббор ака пирог пишириш сирлари билан бўлишди!
Жуда қойилмақом маслаҳатлар бўлди!
Шундан сўнг, Нобель жуфтлиги хонанда Рухшона билан интерактив ўйин ўтказишди! Рухшона аслида нима деётганидан, йигитларни сўзларни ўзгартириб турганидан ўзи бехабар ҳолда, шоу бизнесдаги алдоқчи ва ғийбатчиларни санаб берди!
Сўнг, Аслбек Амануллоҳ “Бойлама” қўшиғи ва ўзига хос рақслари билан томошабинларни янада қувонтирди.
“Қошмақом” дуэтидан Нозимжон Сафаров “Энг аҳмоқ” интеллектуал ўйинини, иштирокчилар Расул 24, Ислом Али ва Арсен билан биргаликда ўтказди.
Тоға жиян қўллаб-қувватлаши асносида, Ислом Али ғолиб бўлди!
Расул 24 нинг чиқиши ўта кутилмаган ва мураккаб бўлди! У бир актёр театридан лавҳалар намойиш қилди! Яъни, бир қизни уйига бир йигитни бошлаб келиб, ота-онасига таништириш ҳолатини ўта ҳазиломуз кўрсатиб берди! Қиз, йигит ва унинг ота-онаси ролларини бир ўзи ижро қилди!
Концерт, “Ҳасан ва Ҳусан” триосининг “Ойбек ва Нигора” ҳақидаги шоубизнесга оид мультфильм дубляжи билан ниҳоясига етди! Бундай дубляжни ҳам минг таърифлагандан яхшиси бир бор, кўрган афзал! Айтиб ўтиш керак бизга энг ёққан номерлардан бири бўлди.
Концерт якунида, СOMEDY UZ резидентлари, барча ташкилотчилар ва дўстларга миннатдорчилик билдирдилар!
Концерт ниҳоятда файзли, гап тагидаги гап-сўзларсиз, фақат ижодга асосланган ҳолда ўтди! СOMEDY UZ ҳақиқий ижод билан томошабинларни тўхтовсиз кулдиришди! Олқишлар тинмади! СOMEDY UZ тинимсиз ижодий меҳнатлари, томошабинларга манзур бўлганлигига асло шубҳа йўқ!
Концертга таклиф учун Ислом Алига миннатдорчилик билдирамиз.
Феруз Фаттохова
Саида Вахобова
Фотолар учун X Frame Media Production студияси фотографи Аҳрор Назировга миннатдорчилик билдирамиз.
